Bilboko Musika Bandeak Jesus Santandreuren obra barria estreinauko dau

| Ikusi handiago | Argazki originala

Bilboko Udal Musika Bandeak Hurreko glosak izeneko kontzertuagaz agurtuko dau zezeileko programazinoa. Taldeak Jesús Santandreu maisuaren oboe - korno ingeles eta tronpetarako egindako Consonances. Concerto for double reeds & valves obrea estreinauko dau.

Bandak maila handiko eta taldeko kide diran hiru bakarlarigaz konpartiduko dau agertokia: Elsa Roch oboe-korno ingeles bakarlaria, Carlos Roch tronpeta-jotzailea eta José Vicente Pla klarinete-jolea. Kontzertua Euskadiko Musikari Gazteen XIV. Lehiaketan saritutakoen laguntzea be izango dau.

José R. Pascual-Vilaplana zuzendari titularra arduratuko da Bandea gidatzeaz eta lau obra bandistiko interpretauko ditue. Estreinaldiaz gan, ikusleek John Zdechliken Chorale and Shaker Dance, Jesús Santandreuren Melodic Gradations for Clarinet and Wind Ensemble eta Amando Blanquerren Gloses II lako lanez gozau ahal izango dabe.

Kontzertua, domekan, zezeilaren 20an, 12:00etan izango da, Euskalduna Jauregiko Auditorioan. Sarrerak jauregiko leihatiletan, www.euskalduna.eus webgunean eta Kutxabank kutxazainetan erosi daitekez. 5 euroan publiko orokorrarentzat eta 4 euroan 65 urtetik gorakoentzat, pensinodunentzat, erretiratuentzat eta Gazte Txartelaren titularrentzat, gehi kudeaketa-gastuak (1,50 euro).

 Euskalduna Jauregiko kontzertu zikloari martiaren 13an emongo jako amaierea, Gomutak hurretik ikuskizunagaz. Denporaldiko saiorik berezienetako bat izango da, izan be, azkena izateaz gan, Bandeak eta Jose R. Pascual-Vilaplana zuzendariak Mikel N'Dong piano-jotzailea eta Musikene Euskal Herriko Goi Mailako Musika Ikastegiko ikasle batzuk izango ditue lagun. Iñaki Carcavilla, Mikel N'Dong, Ramón Ramos eta Igor Stravinskyren lanak izango dira entzungai kontzertu honetan.

Egungo osasun-egoerea dala eta, nahitaezkoa izango da maskarea erabiltea, baita 3 urtetik gorako umeek be.