200 jarduera baino gehiago Bizkaiko museo eta foru aretoetako kultur eskaintzan

Bizkaie! 2022-01-28 08:25   Kulturea

Bizkaiko Foru Aldundiak 2022an kultur eta ondare intereseko museo, areto eta enklabeetan jorratuko dan jarduera egitarau zabala aurkeztu dau (Bilboko Arkeologi Museoa, Arrantzaleen Museoa, Muñatones Gaztelua, Euskal Herria Museoa, El Pobal Burdinola, La Encartada Fabrika-Museoa, Txakolingunea, Santimamiñe, Ondare Aretoa eta Rekalde Aretoa).

Bizkaiko Foru Aldundiak Bizkaiko ondarearen atal bat hurreratzen deutse Bizkaiko herritarrei 2022an 200 jarduera baino gehiagoren bidez. Askotariko programazinoak 31 erakusketa, 40 bisita gidatu, era askotako 28 eskola-tailer, familientzako 50 tailer, 15 berbaldi, 14 ondare-ibilbide, 75 erakustaldi, 6 probantza eta 3 argitalpen eskaintzen ditu. Herritarrek urtean zehar foru museoetan egingo diran jarduera horreez eta beste batzuez gozau ahal izango dabe, besteak beste, kontzertuak, olgetak, bisita antzeztuak, topaketak artistakaz...

Lorea Bilbao Ibarrak, Euskera, Kultura eta Kirol diputaduak, aurtengo jardueren egitaraua aurkeztu eta nabarmendu dau Aldundiaren museoek barriro be Bizkaiko gizartearen eta bisitetan gaituenen esanetara jarten dira gure bitxirik preziatuenak erakusteko, nor garen eta nondik gatozen erakusteko eta hori guztia jarduera programa potolo baten bidez egingo da. Programa horretan kalidadekoa, erakargarria eta askotarikoa izatea gailentzen da, edozeinentzako eta Bizkaia osotik eskaintzen da eta guztiok topauko dogu gure espazioa eta modu entretenigarrian ikasi egingo dogu. Programea sekulakoa da eta 9,5 inguruko notea lortu eban aurreko urtean bisitau gintuenen artean. Diputatuak azaldu dauenez, gure museoek tresna erabilgarria eta beharrezkoa izaten jarraitzen dabe gizarte hau sendotzeko eta hazteko: 50 ikasle inguruk euren lehen praktikak egin ditue gure zentroetan. Bilbao Ibarrak gogorarazo dau museoak oinarrizkoak dira talentua sustatzeko, Rekalde Aretoko Barriek programako ia ehun artista hasibarrien kasuan bezela. Frantziako, Italiako, Britainia Handiko, Esloveniako, Alemaniako edo Poloniako kultura eta prestakuntza-erakundeakaz lankidetzan ibili gara. Gainera Lorea Bilbaok adierazo dau museoak tresna garrantzitsuak dira udalerrietako kultura-eskaintzea hobetzeko, azken hamar urteetan 80 erakusketa ibiltari baino gehiago antolatuz. Horrek guztiak euren inguruneagaz lotuta dagozan museo, areto eta foru-guneak ditugula erakusten dau, gure gizartea hobeto egituratzeko beharrezkoak diranak.

El Pobal burdinolaren eta La Encartada Fabrika-Museoaren erakustaldiak; Txakomic programa eta probantzak Txakolingunean; Indautxuko Jesuiten ikastetxearen mendeurreneko erakusketa Ondare Aretoan eta Ertibil Erakusketearen 40. urteurrena Rekalde Aretoan; Arkeologi Museoaren erakusketako gaztelu oroigarriak eta emakumeen protagonismoa Gernikako Euskal Herria Museoan Mairin Mitchelli eskainitako erakusketan. Izaro ugartearen presentzia Bermeoko Arrantzaleen Museoan eta Santimamiñeko kobearen eskaintza barritua edo Muñatones gazteluaren birsortzeak. Bisita gidatuak, ibilbideak, erakusketak, erakustaldiak, hitzaldiak zein tailerrak izango dira 2022. urtean.

2022ko programazioa doban eskura daiteke foru sareko museo eta areto guztietan eta katalogoa online be deskargau daiteke hemen. 

Jarduera aitagarriak

Bilboko Arkeologi Museoan bagilaren 22tik aurrera ikusgai egongo da Euskal Herriko gazteluak eta gotorlekuak erakusketea.

Bermeoko Arrantzaleen Museoan erakusketa barria izango da: Izaro.

Gernikako Euskal Herria Museoak Mairin Mitchell. Euskaldunen kronikari irlandarra erakutsiko dau martitik aurrera.

El Pobal Burdinolak El Pobal baino harago emongo dau ezagutzera Bizkaiko burdinaren historiari eta kultureari lotutako ondarea.

Muñatones gazteluak udako domeka guztietan bisitaldiak eskaintzen jarraituko dau, bagiletik irailera.

La Encartada Fabrika-Museoak bisitaldi gidatuen bidez erakutsiko deutso jenteari bere makineria berreskuratzeko egindako prozesua.

2022an, Santimamiñen, barrunbearen ondarearen hezkuntzeagaz eta zabalkundeagaz lotutako programak lantzen jarraitzeaz gan, kobazuloko atarirako sarbideak hobetzea planteau da, benetako bisita egokituagoa eta zuzenagoa izan daiten.

Urtean zehar Bakioko Txakolinguneak bere jardueren artean era askotako ardaoak probetako saioak eta buztarketak eskaintzen jarraituko dau sommelier eskarmentudunen eskutik, zentrora jente gehien erakarten dauen jardueretariko bat. Horregaz batera txakolina eta komikia buztartzen dituan Txakomic lehiaketearen bigarren edizinoa be eskainiko da, Euskadin aitzindaria dan esperientzian.

Rekalde Aretoak 40. edizinoa ospatuko dau Bizkaiko Foru Aldundiak atondutako Ertibil Bizkaia 2022 arte bisualen erakusketa ibiltariak, Bizkaian sormen-lana jorratzen dabizen artistei laguntzeko eta sustatzeko helburua betez.

Ondare Aretoan, Indautxuko Jesuiten Ikastetxearen sorrerearen mendeurrena ospatzeko erakusketea izango da.

Gainera, aurreko urteetan legez, maiatzetik irailera bitartean Ibilbide Historikoen programea jarriko da martxan.

Hiru argitalpen barri argitaratuko dira:

El Pobal burdinola: Viaje por las ferrerías vascas Cuaderno de campo del ingeniero Luis Barreiro (1909-1917).

Arkeologi Museoa: Cuaderno nº 11: Catálogo de la exposición 'Castillos y fortalezas'.

La Encartada: Tejiendo historias, fabrikako langile ohien testigantzak biltzen dituen argitalpena.