Gabonetako kontzertua dakar Bilboko Udal Bandeak urtea amaitzeko

| Ikusi handiago | Argazki originala

2021eko urtea biribiltzeko, gabonetako kontzertu tradizional bikaina atondu dau Bilboko Udal Musika Bandeak, abenduaren 22an, eguaztena, Euskalduna Jauregian. Gabonak hur titulupean, era guztietako publikoaren gustuko errepertorioa joko dabe bandakoek, tartean euskal kantutegiko abesti ezagunak zein gaur egungo konpositoreen piezak dagozala.

Besteak beste, Gorka Hermosa akordeoilari gipuzkoarraren Neotango Concerto, Raimundo Sarriegiren Minuetoa, Eduardo Gorosarriren Idiarena eta Oscar Navarroren Sueños de Sal interpretauko ditu Udal Musika Bandeak. Anje Duhaldek ezagun egindako Eperra abesti herrikoia be joko dabe, Iñaki Urkizuk banda formaturako egin dituan egokitzapenei esker. Nazinoarteko konpositoreen artean, Leroy Andersonen Sleigh Ride eta Toshio Mashimaren Dream in the Silent Night aitatu leitekez. 

Udal Bandako musikariak ez dira bakarrik egongo Euskaldunako oholtzan, konbidadu ugari eroango dituelako urteari agur esateko kontzertura. Bilbao Musika erakunde publikoaren hiru koruak (umeena, gazteena eta helduena) eta Udal Txistulari Bandea dagoz kolaboratzaileen artean, baita Gorka Hermosa akordeoilari eta konpositorea be. 

Hitzordua 19:30ean da. Sarrerak salgai dagoz Euskaldunako txarteldegian zein webgunean, baita Kutxabanken kutxazainetan be. Bost euro da prezio orokorra, baina lau euroan erosi ahal izango ditue erretiratuek eta Gazte Txartela dabenek. 

José R. Pascual Vilaplana izango da kontzertuko gidaria, Udal Musika Bandako zuzendari titularra. Beti pentsau izan dot gabon sasoia norberaren jatorrira hurreratzearen alegoria dala; hurrekotasunak eskuzabaltasuna eta konpromisoa eskatzen ditu, balio horreek barik munduak argitzen gatxak diran iluntasunak sortu leikezalako, azaldu dau Pascual Vilaplanak. Kontzerturako aukeratu dauen errepetorioak, hain zuzen, idea hori musikearen bidez adierazoten dau.