Uribe Butroek be aurrera egin dau BBK Sariketan

Mungiako saioa (argazkia: Bertsozale Alkartea) | Ikusi handiago | Argazki originala

Bertsolari Gazteen BBK Sariketako bigarren kanporaketea Mungiako Torrebillela aretoan jokatu da, herriko ikastetxeetako gazteak entzule dirala. Uribe Butroe eta Arratiako taldeak lehiatu dira, Iñaki Iturriotz gai-jartzailearen esanetara. Epaileen puntuazinoaren arabera, Uribe Butroekoek irabazi dabe, eta, beraz, txapelketako hurrengo fasean kantauko dabe, finalaurrekoetan.

Bizkaiko Bertsozale Alkarteak zabaldu dauen zerrendearen arabera, Uribe Butroeko seikotean honeek egon dira: 18 urtera arteko mailan, Lur Olabarri, Eneko Elordui eta Izaro Bilbao; eta 25 urtera artekoetan, Ainhoa Gorostiaga, Joseba Ortuzar eta Jokin Arriola.

Arratiaren ordezkariak honeek izan dira: 18 urtera artekoetan, Aner Zuluaga, Joane Bilbao eta Maindi Estiballes; 25 urtera bitartekoetan, Amaiur Atxa, Unai Intxausti eta Irune Basagoiti.

Mungiako saio honetako epaileak Beñat Romero, Leire Etxebarria eta Miriam Juaristi izan dira; idazkari, Idoia Anzorandia. 

BBK Sariketako hurrengo kanporaketa biak datorren astean jokatuko dira. Urriaren 25ean, Gueñesen, Enkarterri/Ezkerraldea eta Lea Artibai izango dira oholtzan. 27an, Bilbon, Hego Uribe eta Busturialdeko bertsolari gazteen txandea izango da.