Digitalizazinoan pausuak emoten dabil Euskal Herriko Trikitixa Alkartea

Bizkaie! 2021-06-11 08:47   Musikea

1972an Usurbilen lehen aldiz trikitilariak batu eta hazia erein ebenetik mende erdia beteteko dagoanean, Euskal Herriko Trikitixa Alkartea 2022ari begirako barrikuntzakaz dator:

- Webgune barria: https://trikitixa.eus/

Webgune barri honen etorkizuneko proiektua da trikitixearen wikipedia barrubatzea, trikitixeagaz zerikusia dauen dokumentazinoaren bilgunea, hain zuzen be.

- Irudi barria dau trikitixa alkarteak

Iker Torres Rekondo diseinatzailearen eskutik, zenbait hilebetetako lanketearen ondoren sortutako logoak, EHTEren ibilbide barria irudikatu gura dau. Trikitixeak barruan dituen soinu-txiki eta panderoagaz buztartuz, mobimentua eta dinamismoa emon deutso Ikerrek EHTEren izakerea ezin hobeto erakutsiz; nondik gatozen ahaztu barik, nora goazen etenbarik eguneratuz.

- Kolpeka (@kolpeka_) saio barria

Gazteek eta gazteentzat sortuta, gure sare sozialetan saio barria argitara emongo dabe. 2021ean zehar, EHTEren ekimenez eta boskote parebako baten gidaritzapean, sei bideo ezbardin aurkeztuko ditue, trikitixearen protagonista ezinbestekoak gonbidatuta.

- Trikitixea gaur egungo gazteen adierazpidea

Gaur egun 3000 ikasle inguru ditu trikitixeak Euskal Herrian zehar dagozan ehunka eskoletan, horreetatik heren bi emakumezkoak izanik. Errealidade horri erantzunez, lanean jarraitzen dau EHTEk.

Jarduerak

- Gazteen Trikitixa Topaketa eta Gaztetxuen Trikitixa Udalekua Asteasuko Otabardi aterpetxean, bagilaren amaieran izango dira.

- Ataria Irratiagaz alkarlanean Hauspo Artean irratsaioan atal barriak sortuz jarraitzen dabe Manex Torrealdai Gorritiren eta Maixa Lizarribar Saizarren gidaritzapean.

- Dani Fano Ardanazek ilustrauta eta Koldo Izagirre Urreagaren gidoipean Sasi artean Elgeta komiki liburua argitaratuko dabe hiru urteko lanaren ondoren eta Ikastolen Alkarteagaz alkarlanean.