Martin Abarrategi eta Manex Agirre, Arabako txapeldun

Bizkaie! 2021-05-24 07:56   Bertsolaritzea

Legutioko kiroldegian 200 entzule inguru batu dira.

Manex Agirre eta Martin Abarrategi txapelak alkarri jazten (argazkiak: Arabako Bertsozale Alkartea) | Ikusi handiago | Argazki originala

Arabako Binakako Txapelketea egin dabe lehenengoz aurten, eta Manex Agirre eta Martin Abarrategi izan dira irabazleak. Legution jokatu da finala, giro onean eta 200 entzuleren aurrean. Kanporaketak atzean itxita, hiru bikotek kantau dabe azken saioan: Iñaki Viñaspre-Unai Anda, Martin Abarrategi-Manex Agirre eta Manu Bendala-Oihane Perea.

Nieves del Álamo aurkezle dala, eta Eli Plazaola gaiak jarten, ariketa puntuagarri ugari egin behar izan ditue hiru bikoteek. Epaimahaiak 828 puntugaz saritu dau Martin Abarrategi-Manex Agirre bikotea. Bigarren Iñaki Viñaspre eta Unai Anda izan dira (820 puntu); hirugarren, Manu Bendala eta Oihane Perea (816). 

Epaimahaian honeek egon dira: Aitor Jimenez, Ekaitz Elorriaga, Iker Elexpuru, Fernando Sopelana eta Mikel Fernandez de Arroiabe. Idazkari Endika Jimenez ibili da.

Bertsolari irabazle biek alkarri jantzi deutse txapela. Ondoren, agurreko bertso bana bota dabe.

Manex Agirre:

Abarrategi Sarrionandia

a ze bertsolari saga

ta a ze poza txapel bat doa

behingoz Uxarko salara

nirea berriz bidali nahi dut

gure bertso eskolara

pandemiaren erantzun gisa

ere balio du hara

hemen ezin da funtzionatu

taldean ez baldin bada

Martin Abarrategi:

Nahi ta tabernan egongo ziren

hemen baino askoz hobeto

eta pare bat aharrausi egin

gure bertso bakoitzeko

egia esan bai harro nago

kuadrillakoek 15 pabo

zer eta ni entzuteko

aupa Manex bi izan gara

gurdipea bultzatzeko

eta txapel bat dugu buruan

egiten duguna tarteko

banatu nahian gure txapela

beharko ditut konpas ta erregela

bateko eta besteko

asko baitut eskertzeko

Arabako Bertsozale Alkarteak eskerrak emon deutsez txapelketan parte hartu daben bertsolari, gai-jartzaile eta epaileei, eta baita txapelketa osoan zehar laguntzaile izan dituen bertsozaleei, bertso-eskolei, saioak hartu dituen udalei, babesleei, laguntzaileei zein hedabideei be.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu