Lanbide Heziketako Beharlekuko Prestakuntzea eta Duala euskeraz egitea sustatzeko esperientzia abiarazo dabe

Bizkaie! 2020-10-20 08:32   Euskerea berbagai

Gipuzkoako Foru Aldundiak, Eusko Jaurlaritzako Kultura eta Hizkuntza Politika sailak eta Hezkuntza saileko Lanbide Heziketa atalak, Lanbide Heziketarako euskerazko baliabideez eta euskerazko Lantokiko Prestakuntzea eta Dualaz (LP-Duala) arduratzen dan Laneki alkarteak eta euskerea eta barrikuntza sozialean aholkularia dan Emun kooperatibeak esperientzia pilotua abiatu dabe alkarlanean, Lanbide Heziketako LP-Duala euskeraz egitea sustatu asmoz. Euskeraz, talentua gara! lemapean, praktika onak identifikau eta zabaltzeko kanpainea jarriko da abian, Ikastetxeetako hainbat arduradunentzako (Zuzendaritzako kideak, Hizkuntza Normalkuntza Arduradun Teknikariak, LP-Dualeko arduradunak eta tutoreak, irakasleak) eta ikasleentzako barriketaldiak atonduko ditue beharlekuetako arduradunakaz, hizkuntzen erabileraz eta funtzinoez gogoetea egin eta euskereak lan munduan dauen balio erantsia erakusteko.

2018-2019 ikasturtean, 1.130 enpresetan egin eben LP-Duala euskeraz. Horreetan guztietan banatuta, 1.506 ikaslek egin zituen enpresetako lanaldiak euskeraz, lan prestakuntza (1.109) zein Lanbide Heziketa Dualeko ikasle legez (397). Danetara, 4.016 ikaslek egin eben ikasturte haretan LP nahiz Duala, euskeraz zein gaztelaniaz. Erakundeetako ordezkariak bat etorri dira proportzino horretan salto bat emon eta euskerazko LP-Duala ikasle eta beharleku gehiagorentzat erakargarri izatea da esperientzia pilotuaren asmoak. Aldi berean, euskerazko LP nahiz Dualak beharlekuaren barruko hizkuntza ohituretan eta euskerearen erabileran arrasto bat itxi deian mekanismoak ezarriko dira.

Era berean, azterlan bat egingo dabe, LP-Duala euskeraz eskaintzen ez daben enpresei entzunez, horretarako sakoneko arrazoiak zeintzuk diran jaso eta horreetan eragiteko estrategia bat zehaztu ahal izateko. Lau eskualdetan abian jarriko da proiektua: Debagoienan, Debabarrenan, Goierrin eta Tolosaldean.

Egitasmoaren aurkezpena Gipuzkoako Foru Aldundian egin da eta bertan izan dira Garbiñe Mendizabal, Hizkuntza Bardintasuneko foru zuzendaria; Miren Dobaran, Eusko Jaurlaritzako Hizkuntza Politikako sailburuordea; Niko Sagarzazu, Hezkuntza Saileko Plangintza eta Antolaketako zuzendaria; Ainitze Blanco, Lanekiko lehendakaria eta Olatz Olaso, Emuneko zuzendari nagusia.

Izakera orokorreko ekimenak:

Geomapea: LP-Duala euskeraz eskaintzen daben enpresakaz geomapea osotuko da, enpresek euskerearen normalizazinoari egiten deutsen ekarpena autortuz eta Lanbide Heziketako ikastetxeei eta ikasleei enpresa euskaldunen lokalizazinoa errazteko.

Praktika onak: LP-Duala praktika onak eta esperientzia eredugarriak identifikau eta zabalduko dira.

Hizkelan: Hizkelan jardunaldia Lanbide Heziketa, enpresa, alkarte eta erakundeen zubi lanerako ekitaldi garrantzitsua da. Alkargune izateaz gan, praktika onak eta ezagutzak konpartiduteko lekua be bada. Urriaren 20an egingo dabe aurtengo Hizkelan jardunaldia.

LP-Duala euskeraz egin dauen enpresa bati oroigarria emongo jako.

Lanbide Heziketako ikastetxeak, ikasleak:

Berbaldi-tertuliak: Ikasleak LP-Duala euskeraz egin deien animauko dira, hizkuntzen erabileraz eta funtzinoez hausnartu eta euskereak lan munduan dauen balio erantsia erakutsiko da.

Komunikazio kanpainea: Eskualdeko persona erreferenteek (enpresa buru, langile, ikasle, kirolari...) euskeerak dauen balioa nabarmentzea, lan munduan zein Lanbide Heziketan.

Enpresak

Gosari bilerak: Enpresei Enpresen Gizarte erantzukizunaren esparruan euskerearen balioaz jaubetzeko azalpenak emon eta euskerearen normalizazinoan pausuak emon deiezan animauko dira, hasierako pausu legez praktikaldiak euskeraz egiteko aukerea eskainita.

LP-Duala euskeraz zer dan azaltzen da, enpresei laguntzea emonez eta holan enpresa kopurua handitzea espero da. Eskaintzea handitu behar da gero eta gehiago diralako euskeraz ikasten dabenak.

Autodiagnostikorako tresnea: Enpresak berak bere autodiagnostikoa egin deian aplikazino informatikoa egingo da eta autodiagnostikoaren emoitzetatik abiatuta proposamenak egingo jakez, bakotxak komenidu jakon modu eta erritmoan egin daian.

Entzute alkarrizketak: Beharlekuko Prestakuntza edota Duala euskeraz eskaintzen ez daben enpresei entzutea, horretarako sakoneko arrazoiak zeintzuk diran jaso eta horreetan eragiteko plana zehazteko.

Garbiñe Mendizabalek, Gipuzkoako Foru Aldundiko Hizkuntza Bardintasuneko zuzendariak adierazo dauenez, euskereak lan esparruan salto esanguratsu bat egiteko aukerea dogu, azken hamarkadetan euskerea ezagutzeak emon dauen aurrerapausuari esker. Gure lurraldeak Lanbide Heziketako sare barritzailea dau, baita punta-puntako enpresa eta industria gaitasuna. Egitasmo barri hau bultzatzeko, Gipuzkoako Foru Aldundiaren gogoa izan da, batetik, ikasleek beren lehen lan esperientzia euskeraz izateko aukerak sustatzea, hau da, ez etetea lan munduan hezkuntzan egindako euskerazko ibilbide naturala. Bestetik, prestakuntza horreek enpresetan euskerearen erabilereari bultzada barri bat emoteko erabiltea. Gaur egungo langileak eleaniztunak dira eta beharlekuak hezkuntzan egindako ibilbidearen segidea behar dau.

Beste alde batetik, Euskerearen eremuan, azken urteetako gure egiteko bat izan da eremu sozioekonomikoan euskerea sustatzeko lan arloa sendotzea eta betik azpimarratu dogu eragile guztiak entzunez eta euren proposamenak babestu nahiz indartuz egingo genduala aurrera. Lankidetza horren ondorioa da Euskeraz, talentua gara programea be, azaldu dau Miren Dobaranek, Eusko Jaurlaritzako Hizkuntza Politikako Sailburuordeak. Gaineratu dauenez, gaur aurkeztutako egitasmoak lanbide heziketea, ikasleak eta enpresak batzen ditu, euskerearen kudeaketan arretea jarriz. Lan eremuan, oraindino, bide barriak urratzeko beharra dago baina Gipuzkoan egingo dan proiektu pilotu honen emoitzak lagungarri izango dira beste lurralde eta eremuetan be zabaltzeko.