Haira Aizpurua Ibargaraik jantzi dau txapela

Haira Aizpurua Ibargarai, txapela buruan eta kantetan. | Ikusi handiago | Argazki originala

Haira Aizpurua Ibargarai kantetan.

Oraintsu jokatu da Xiberoa, Lapurdi eta Baxenabarreko Eskolarteko Xapelgoa Senpereko Larraldea baserrian. Aretoa ikuslez bete zan eta bertaratuek giro ederrean gozau eben. Nabarmentzekoa da aurten inoizko edizinorik parte-hartzaileena izan dala.

Danetara, 24 bertsulari gaztek parte hartu dabe kanporaketetan, horreetatik 12 finalerdietara pasau ziran eta lehenengo seien artean jokatu zan finala.

Goizeko 10:00etan hai ziran final aurrekoak eta ondoko 12 bertsulariek hartu eben parte saio bietan: Oneka Arteaga Olasagasti, Haize Blanco Lekuona, Ximun Sansonetti, Josu Txoperena Iribarren, Aetz Etxart Sarasola, Ibai Lekuona Darceles, Mae Laskaray Lagan, Asier Arbelaitz Tolosa, Irati Aizpurua Ubeda, Irantzu Idoate Funosas, Haira Aizpurua Ibargarai eta Laida Etxeberri Pacheco.

Finalerdien ondoren, Finala jokatzeko momentua heldu zan eta ondoko sei bertsolariak sailkatu ziran:

· Oneka Arteaga Olasagasti

· Mae Laskaray Lagan

· Josu Txoperena Iribarren

· Irantzu Idoate Funosas

· Haira Aizpurua Ibargarai

· Laida Etxeberri Pacheco

Finala jokatu eta Haira Aizpurua Ibargaraik batu zituan puntu gehien. Urte luzez Bertsularien Lagunak Alkarteko kide eta parte-hartzaile aktiboa izan dan Beñat Soulék jantzi eutson xapela.