Zelan egiten deutso aurre gastronomiak koronabirusari?

Bizkaie! 2020-04-29 11:48   Jan edanak

Nazinoartean eredu diran chef edo sukaldariburuek ‒Basque Culinary World Prize (BCWP) lehiaketearen irabazleak eta finalistak tartean‒ azalduko dabe zelan dabizen aurre egiten Covid-19 pandemiari; era berean, sukaldaritzan dauen eragina azalduko dabe, laguntza ekimenak konpartidu eta gastronomiak elikagaien sektoreari eta gizarteari oro har emon leuskion erantzunen inguruan eztabaidatuko dabe.

Apirilaren 29an, 16:30etik 18:30era (CEST) antolatutako Zoom bidezko topaketa digitalean kozineruek ondoko gaiak jorratuko ditue:

• Ze eragin dau koronabirusak zuon herrialdeetako elikagaien industrian eta gastronomiaren sektorean?

• Zelako eragina izan dau horrek zuon lanean eta zelan zabizie egokitzen errealidade barri horretara?

• Zelan irudikatzen dozue koronabirus osteko egoerea?

• Kozineruok zelan zabizi igaroten momentu honetako egoerea?

• Ze rol izango dau gastronomiak eta izango dozue zuok, Covid-19aren ostean?

Ekitaldian hiru izar dituan Michelin Azurmendi jatetxeko Eneko Atxak eta Anthony Myintek eta Maria Fernanda di Giacobbek parte hartuko dabe, azken biak BCWP sariaren irabazleak. Sari hori urtean behin emoten da eta Eusko Jaurlaritzeak eta Basque Culinary Centerrek sortu eta babestu dabe, sukaldaritzaz haragoko eragina daben ekimen eraldatzaileak gauzatzen dituen chefen aintzatespenerako.

Basque Culinary World Prizen helburua da gastronomia gizartearen onurarako erabilten daben chefen lana autortzea, izan be, inoiz baino garrantzitsuagoa da orain hori. Ekimenean parte hartuko daben sukaldeburu gehienak izentauta egon izan dira edo saria irabazi dabe eta gaur egungo egoeran, gastronomiak gizartean eragin positiboa zelan izan leiken adierazoko dabe.

Hedabideak be gonbidauta dagoz Zoom bidez online egingo dan ekimenera eta parte hartuko daben chefen adierazpenak entzun ahal izango ditue. Era berean, hedabideek chef horreei galderak egiteko aukerea izango dabe.

Sukaldariek pandemiaren inguruan dituen ikuspegiak

Basque Culinary World Prize 2020rako izentapenak 2020ko garagarrilaren 1era arte egongo dira zabalik. Aurten, koronabirusak sektore gastronomikoan eta gizartean dauen eragina murrizten laguntzen daben chefei zuzenduta egongo da saria.

Topaketa digitalarekin bat egin nahi izan ezkero, jarri harremanetan ondoko helbidea erabilita: xusane@vkcomunicacion.com .

Egitaraua

16:30 Sarrerea:

Joxe Mari Aizega jn. – Basque Culinary Centerreko zuzendari nagusia.

Arantxa Tapia and., Eusko Jaurlaritzako Ekonomiaren Garapeneko eta Azpiegituretako sailburua.

16:45 Eneko Atxa

Eneko Atxa chefak gizarte iraunkor, osasungarri eta bidezkoago bat sustatzeko gastronomiaren bidez egindako ahalegina hainbat proiektutan islatzen da, besteak beste, bere jatetxeko arkitektura ezaguna, bertako ospitale bategaz menu osasungarri baten diseinuan lan egitea eta JAKI (N) proiektua. Azurmendi, Enekoren jatetxea, ahalik eta hondakin eta kutsadura gitxien sortzeko diseinauta dago. Berotegi bat, baratze bat eta inguruko ehun hektarea baso ditu, CO2 isurketei aurre egiteko. Bilbon, Londresen eta Tokion be jatetxeak ditu.

17:00 David Hertz

Irabazi-asmorik gabeko Gastromotiva ekimenaren sortzaileetako bat da David. Sao Pauloko, Rioko eta Mexiko Uriko eremu txiroetako gazteei dobako sukaldaritza gaikuntzea emotea dau helburu. Egungo pandemian, Gastromotiva elikagai banku legez dabil lanean Rion eta sare bat gidatzen dau, eleizetan eta komentuetan elikagaiak banatzen laguntzeko.

17:15 Maria Fernanda di Giacobbe

Mariak BCWP saria irabazi eban 2016an, Cacao de Origen/Jatorrizko Kakaoa ekimenagaitik. Kakaoaren inguruko hezkuntzea, ekintzailetzea, ikerketea eta garapena barrubatzen dituan sarea da, nortasun, kultura eta aberastasun ekonomikoaren iturri legez. Sare horren bidez, aukerak emon deutsee emakume ahulenei, batez be, mikroenpresaburu izateko aukerea emon deutse.
 

17:30 Diego Guerrero

Diegok Michelin izar bi ditu Madrilgo DSTAgE jatetxean eta Basque Culinary Center Fundazinoaren Patronatuko kide da. Gaur egun, The World Central Kitchen proiektuan laguntzen dau. Proiektu horretan, boluntario sare indartsu bat dabil lanean, egun laguntza gehien behar daben personei janari solidarioak kozinau eta banatzeko, berbarako, gaur egun ospitaleetan COVID-19ari aurre egiteko lanean dabizen osasun langileei.

17:45 Ebru Baybara Demir

Ebruren proiektuak From Soil to Plate dauka izena. Mugako Mardin probintziaren testuinguruan kokatzen da. Gune horretan errefuxiatu asko dagoz eta Siriako errefuxiatuen artean emakumeen lanbako tasa handiari aurre egitea dau helburu, sukaldari bihurtzeko aukerea emoten baiteutse. Pandemia dala tarteko, Ebruk programa bat gidatu dau eta horri esker, tokiko materialak erabiliz xaboi naturalak produzidu eta saltzeko lanean dabiz orain. Diru sarrerak siriar emakumeentzat izango dira.

18:00 Douglas McMaster

Siloren bitartez, Erresuma Batuko lehen zero-waste jatetxea baita, Douglasek nazinoartean fenomeno bihurtu dan mobimentu bat gidatu dau; hor ez da ezer alferrik galtzen eta dana berrerabilten da. Birziklatzearen ordez, hondakinak balioko objektu bihurtzearen alde egiten dau, sormenaren bidez erabilitako materialak eraldatu eta kalidade bardineko edo kalidade handiagoko zeozer sortzeko.

18:15 Anthony Myint

Anthony, 2019ko BCWP sariaren irabazlea, sukaldari txalotua izateaz gan, klima aldaketeari aurre egiteko gastronomia erabilten dauen elikagaien egile eta aholkularia be bada. Zero Foodprint eta Perennial Farming Initiative proiektuen bidez, elikadura enpresei aholkuak emoten deutsee karbono aztarnak murrizteko. Mundu osoko goi mailako dozenaka jatetxe konbentzidu ditu iraunkortasunaren aldeko kanpaineagaz bat egin deien. “Restore California” sortu eban: lur osasuntsuan errotutako elikagai barriztagarrien sistema bat sortzeko batzen diran jatetxe, nekazari eta mahaikideen ahalegin bateratua.

18:30 Alumni BCC:

Silvia Rozas eta Marco Zambon Basque Culinary Centerren gastronomia gradua eskuratu daben persona bi dira. Tradizinoa, sustraiak eta sukaldaritzako sormena lotu nahi ditue, klima baldintzak, ekonomia eta baldintza sozialak dirala-eta Veneziako Aintzirak aurrean dituan erronketarako urtenbideak bilatzeko.

Urteotan aukeera izan dabe sukaldaritzan, proiektuen eta lantaldeen kudeaketan, produktuen diseinuan eta gastronomiaren ikerketan be dituen trebetasunak lantzeko eta hori osotzeko Osteria Francescanam, Celler de Can Rocan, Noman, Elkanon eta Amelian egonaldiak egiteko, ikasteko. Euren zaletasunak alkarrizketa, ekintza eta aldaketarako sare bat eratzea dira, komunidade zuzen edo bidezkoagoa eta inklusiboagoa sortzeko asmoagaz.