Youtube kanal barria sortu dabe: Bilbaomusika Eskola Telebista

| Ikusi handiago | Argazki originala

Kanal horretan, aldian-aldian, hezkuntza-edukiak, ikasleen entzunaldiak zein eskolako ikasleentzat eta irakasleentzat beste gai batzuk argitaratuko dira.

BilbaoMusika Eskoleak ikasgela birtual bat edegi dau eta bertan, eskolako ikasleek ikasgai bakotxerako material didaktikoa topau ahal izango dabe, baita konsultak egiteko irakasleen helbide elektronikoak be.

Joan dan martiaren 12an, COVID-19ak eragindako osasun larrialdia dala eta, Bilboko Udal Musika Eskoleak aurrez aurreko jarduera danak bertan behera ixtea erabagi eta ordutik, maila guztietako ikasle zein irakasleak, koronabirusaren pandemiak eragindako konfinamendura egokitu behar izan dira. Denpora honetan, zuzendaritza eta irakasleak ikasleakaz hartu-emonetan egoten saiatu dira, ahal dan neurrian eskolak emoten jarraitzeko. Esangura horretan, eskola presentzialetara noiz itzuli daitekezan jakiterik ez dagoan arren, BilbaoMusika Eskoleak hainbat neurri hartu ditu, ikasle guztiak ikasten jarraitu ahal izan deien, murrizketak gorabehera. Ekimen aitagarrienetako bat Youtuben BilbaoMusika Eskola Telebista abian jartea izan da. Kanal honetan, hezkuntza-edukiak, ikasleen entzunaldiak eta eskolako hezkuntza komunidadearentzat interesgarriak diran beste gai batzuk argitaratuko dira.

Bestalde, 2020-2021 ikasturterako matrikulea oraindino barritu ez daben egungo ikasleentzat, extranetaren bidez matrikulea barritzeko epea gaur, hilak 24, amaituko da. Ikasle barrien eskaerei jagokenez, epea apirilaren 20tik maiatzaren 17ra artekoa da, 14:00ak arte. Zozketearen emoitzak eskolako iragarki-taulan eta www.bilbaomusika.eus webgunean argitaratuko dira bagilaren 8an, 9:00etatik aurrera.

Matrikulea baliabide telematikoen bidez egiteko zailtasunak dituen erabiltzaileei laguntzeko edota BilbaoMusika Eskolearen jarduerakaz lotutako bestelako dudak argitzeko, telefono bidezko arreta-zerbitzuak zabalik jarraitzen dau, astelehenetik barikura, 10:00etatik 13:00etara.

Erabiltzaileek Bilbao Musikaren atarian (www.bilbaomusika.eus) 2020-2021 ikasturteko ikastaroen inguruko informazino gehiago topau leikie.