Gilles Simeoni, Andres Urrutia, Naizen, Ternua eta Baskonia, Sabino Arana saridun

Irune Zuloaga eta Juan Mari Atutxa, sarituen barri emoten (argazkia: Sabino Arana Fundazinoa) | Ikusi handiago | Argazki originala

Sabino Arana Fundazinoko presidente Juan Mari Atutxa eta zuzendari Irune Zuloaga jentaurrean agertu dira gaur, XXXI. Sabino Arana Sarien irabazleen barri emoteko. Bost saritu dira: Gilles Simeoni, Korsikako Kontseilu Exekutiboko burua; Andres Urrutia euskaltzainburua; Naizen, ume trasexualen familien alkartea; Ternua Group enpresea; eta Saski Baskonia kirol taldea.

Sarion helburua da gizartearen zerbitzuan jarduteko prestutasun eta ahalegin bikainagaitik nabarmentzen diran persona, erakunde eta alkarteen lana autortzea. 1989an lehenengoz emon ziranetik, 175 norbanako eta talde saritu ditue.

Sabino Arana Sariak banatzeko ekitaldia urtarrilaren 26an, domekea, egingo dabe, Bilboko Arriaga Antzokian. Urteroko ospakizun horretan, sarituak eta Fundazinoko arduradunak ez eze, gizartearen, kulturearen eta politikearen arloko jente ezaguna batzen da Arriagan. Ekitaldia 2020ko urtarrilean egingo bada be, gaur jakitera emondako bost sarituak 2019ko edizinoari jagokoz.

Gilles Simeoni Korsika ugarteko nazionalismoari lotuta egon da betidanik, familiatik jatorko. Korsikaren nazinotasuna eta autogobernua autortzeko lanean, bide demokratikoak eta paketsuak erabili ditu. Frantziak ugarteari emon deutsan autonomia zabalagoaren barruan, erakunde nagusiaren, Kontseilu Exekutiboaren, burua da gaur egun.

Andres Urrutia bilbotarra, ostera, Euskaltzaindiko burua da 2004tik. Euskerearen modernizazinoaren eta zabalkundearen alde egin dau, euskaltzain postutik zein beste arlo batzuetan eraginez, eta idazle zaharren ondarea be ikertu dau. Zuzenbidean doktoreduna, notarioa eta Deustuko Unibersidadeko irakaslea be bada.

Naizen alkartearen ahotsa oraintsu hasi da gizarteratzen, lehen ezkutuan geratzen ziran ume transexualen errealidadeaz kontzientzia zabaltzeko asmoz. Seme-alaba transexualak dituen familien alkartea da, batez be Hego Euskal Herrikoa. Alkartasunaren, inklusinoaren eta genero identidadeen errespetuari lotutako balioak zabaltzeagaitik sarituko dau Sabino Arana Fundazinoak.

Ternua Group, ostera, enpresearen munduko proiektua da, Euskal Herrian zuztartua eta mundura zabalik. Moda jasangarriaren eta konpromiso sozialaren alde egin dauen ahalegina txalotu dau Sabino Aranak.

Azkenik, Saski Baskonia Gasteizko taldea be badago sarituen zerrendan, euskal saskibaloiko ospetsuena eta arrakastatsuena. Kirol horren zaletasuna Euskadin zabaltzeko lan ikaragarria egin dau 1959an sortu zanetik. Klubak 60. urteurrena bete dauen ezkero, kirol eta gizarte arloko ekarpen hori nabarmendu nahi dau Fundazinoak.