Anthony Myintek gaur jasoko dau 2019ko Basque Culinary World Prize saria

Bizkaie! 2019-10-24 12:16   Jan edanak

Gastronomia klima aldaketeari aurre egiteko motor lez erabilteagaitik saritu dabe.

Gaur arratsaldean, Donostiako Tabakalerako Prisman egingo da Anthony Myint sukaldari estadubatuarrari 2019ko Basque Culinary World Prize saria emoteko ekitaldia, Gastronomiaren bitartez aurre egiten deutsolako gizartearen erronkarik larrienetako bati: klima aldaketeari, hain zuzen. Ikerketea eta tresna praktikoak buztartuz, Myint mundu osoko jatetxeakaz alkarlanean dabil ingurumenean daben inpaktua murriztuko daben neurrirako konponbideak topetako.

Basque Culinary World Prize saria bakarra eta orokorra da, Eusko Jaurlaritzeak ‒Euskadi-Basque Country estrategia integralaren esparruan‒ eta Basque Culinary Center-ek ‒gastronomian liderra dan erakunde akademikoa‒ emondakoa. Garaikur honek ekimen eraldatzaileak gauzatzen dituen chefen lana autortzen dau, hainbat arlotan: barrikuntzea, teknologia, hezkuntzea, ingurumena, osasuna, elikadura industria eta gizarte eta ekonomiaren garapena.

Euskadiko elikadurearen sektoreko agintari eta persona ospetsuak aurrean zituala, Eusko Jaurlaritzako Ekonomiaren Garapena eta Azpiegiturak saileko sailburu Arantxa Tapiak 100 mila euroko balioa dauen saria emongo deutso Anthony Myinti.

Har ZeroFoodprint proiektuaren bitartez eta The Perennial Farming Initiativeren bitartez, jatetxeen eta ingurumenaren arteko loturak jorratu eta Myintek jarraitzaile ditu, besteak beste, Noma (Danimarka), Benu (San Frantzisko) eta Atelier Crenn (Dominique Crenn) jatetxeak.

2019an, The Perennial Farming Iniative ekimenaren bitartez, Kaliforniako estaduagaz be indarrak batu eta Restore California programea abiarazo eban.

Ekonomian eta Asiako Ikerketetan tituluduna izanik, Myintek, bere emazte Laren Leibowitz kazetariagaz batera, ingurumeneko aktibismoa eta aktibismo soziala sartu ditu bere ahaleginen artean, 2008an Mission Street Food jatetxe ospetsuan bere karrereari ekin eutsonetik.

Basque Culinary World Prize sariari esleitutako 100 mila euroak Zero Foodprint ekimena planetan zabaltzeko erabiliko dira, bai eta hainbat establezimenduri euren baldintzetara egokitzeko moduko jardunbide eta soluzino iraunkorrak apliketan laguntzeko be, holan azken helburura heltzeko: gizarte osoa kontzientzietea klima aldaketeari modu globalean aurre egiteko preminea. Anthony Myint sukaldari irabazlearen berbetan: Basque Culinary World Prize saria jasotea da sukaldaritzako ibilbideari egindako ohorerik handiena. Baina garrantzitsuena da sariak eta epaimahaikide izan diran sukaldari ospetsuek Zero Foodprint ekimenean parte hartzeko erakutsitako konpromisoak munduari erakutsiko deutsiela zelan jatetxeek klima aldaketeari aurre egiten eroan leikien gizartea'.

Munduan eragin handienekoak diren zenbait chef eta adituk osotutako epaimahaiak Antony Myint aukeratu dau irabazle, hamar finalisten artean. Epaimahai horren buru Joan Roca sukaldaria izan da (Celler de Can Roca), eta haregaz batera beste persona ezagun honeek: Massimo Bottura (Osteria Francescana), Manu Buffara (Manu), Eneko Atxa (Azurmendi), Dominique Crenn (Atelier Crenn), Yoshihiro Narisawa (Narisawa), Andoni Luis Aduriz (Mugaritz), Enrique Olvera (Pujol), Trine Hahnemann (Hahnemanns Køkken), Katina eta Kyle Connaughton (SingleThread), Tucker Taylor (Jackson Family Wines) eta Jock Zonfrillo (Orana), 2018ko Basque Culinary World Prize sariaren irabazlea.


Basque Culinary World Prize saria

2016an emon eben lehenengoz, gastronomia indar eraldatzailea izan daitekela erakusten daben personen lana autortzeko, bikaintasuna bokazinoa daben gizon eta emakume ekintzaileen lana; jente berritzaile eta sortzailearen lana, jende saiatuarena, baina, batez be, bere gizarteagaz konprometiduta dagoan jentearena.

Basque Culinary World Prize sariaren laugarren edizino honetan 42 herrialdetako 150 hautagai izan dira: inoizko partaidetza indizerik handiena, 230 izendapenakaz. Sarian parte hartu ahal izateko, gaur egun gastronomiaren munduan lanean dabizen beste profesional baten izendapena behar izan dabe sukaldariek.

Eusko Jaurlaritzeak emoten dauen saria da, Euskadi Basque Country estrategia integralaren barruan sartzen dana. Herri marka bat, indargune eta berezitasunetatik abiatuta bikaintasunaren erreferente, bizi kalidadearen eta kohesino sozialaren eredu eta lurralde barritzaile eta lehiakor lez posizionetan dagoan herri batena.

Basque Culinary World Prize sariaren hamar sukaldari finalistak

Selassie Atadika (Ghana), Siew-Chinn Chin (Malaysia/ AEB) Giovanni Cuocci (Italia), Mario Castrellon (Panama), Xanty Elias (Espainia), Virgilio Martinez (Peru), Cristina Martinez (Mexiko/ AEB), Douglas McMaster (Erresuma Batua), Anthony Myint (AEB) eta Lars Williams (AEB/ Danimarka).

Basque Culinary Center

Erakunde akademikoa da, aitzindaria munduan, unibersidadeko hezkuntzearen arloan eta gastronomiak hezkuntzeagaz, ikerketeagaz, barrikuntzeagaz eta ekintzailetzeagaz lotuta lanean dabilena. 2009an Donostian sortu zanetik, ahaleginak egin ditu sektorearen profesionalizazinoan laguntzen dauen diziplina arteko espazio bat sortzeko.

Kontuyak kontu, Basque Culinary World Prize sariaren banaketa zuzenean jarraitu ahal izango da, 19:00etatik aurrera, hemen.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu