Atzerrian euskerea erakutsi nahi dabenentzako ikastaroa udagoienean

Bizkaie! 2019-07-29 12:29   Euskerea berbagai

Gasteizen egingo dabe 56 orduko formakuntza kursoa.

Szeged uriko unibersidadea, Hungarian. Han dago euskal irakurletza bat. | Ikusi handiago | Argazki originala

Etxepare Euskal Institutuak eta Euskal Herriko Unibersidadeak, Atzerriko Unibersidadeetan eta Goi Mailako Zentroetan Euskerea Irakasteko Prestakuntza Ikastaroa antolatu dabe. Garagarrilean egin zan udako ikastaroaz gan, udagoienean be formakuntzarako aukerea emongo dabe, beraz, urteroko legez. Euskerea eta euskal kulturea atzerrian erakutsi nahi dabenek 56 orduko formakuntzea jasoko dabe. 

Garbiñe Iztueta, Etxepare Euskal Institutuko Euskerea Sustatzeko eta Hedatzeko zuzendariak eta Mari Jose Olaziregi, EHUko Hizkuntzalaritza eta Euskal Ikasketak Saileko irakasleak zuzenduko dabe ikastaroa, biak be adituak atzerrian euskerea eta euskal kulturea zabaltzeko gaietan. Etxepareren irakurletza programearen barruan urtero antolatzen dabe ekimena, atzerriko zentroetan lanpostuak bete nahi dituen lizentziadun eta graduatuei zuzenduta. 

Orain arte, Donostiako Carlos Santamaría zentroan izan da ikastaroa. Aurtengo saioak, ostera, Gasteizen egingo dira, urritik abendura. Izena emoteko epea irailean edegiko dabe. Ikastaroaren helburuak honakoak dira: lanerako estrategia eraginkorrak aurkeztea, euskerea atzerriko hizkuntza legez ezagutu eta eskuratzearen inguruan; euskerearen berezitasunak testuinguru elebakarretan zein eleanitzetan azaltzea; alderdi soziokulturaletan eta balioetan sakontzea; eta atzerritarrei euskerea irakasteko prozesuetako trebetasunak eta gaitasunak hobetzea, IKTak eraginkortasunez erabilita.

Etxepare Euskal Institutuak, mundu akademikoan euskerea eta euskal kulturea ezagutarazo eta bistaratzeko helburuz, euskal ikasketak sustatzen ditu nazinoarteko hainbat zentrotan. Gaur egun, mundu osoko 35 unibersidadetara heltzen da eskaintzea.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu