Irailaren 14an hasiko da Gipuzkoako Bertsolari Txapelketea

Bizkaie! 2019-07-16 12:56   Bertsolaritzea

Oñatiko Santa Ana Antzokian hasiko dan 2019ko Gipuzkoako Bertsolari Txapelketan 48 bertsolarik hartuko dabe parte. Hiru hilebeteko txapelketearen ostean, finala abenduaren 14an jokatuko da Donostiako Illunben. Saio guztietarako sarrerak zein bonuak irailaren 2an jarriko dira salgai www.bertsosarrerak.eus webgunean.

Danetara, 16 saio izango ditu irailaren 14an hasi eta abenduaren 14an amaituko dan 2019ko Gipuzkoako Bertsolari Txapelketeak. Oñatin hasi eta Donostian amaituko da eta 48 parte-hartzaile izango ditu. Horreetatik 34 bertsolarik maiatzean jokatu zan Gipuzkoa Bertsotan sailkapen fasean eskuratu eben txapelketarako txartela. Ganerako 14 bertsolariek orain lau urteko finalaurrekoetara sailkatuta eskuratu eben txartela. Horreez gan, 15 gai-jartzaile, 16 epaile eta 4 idazkari eta laguntzaile ugari izango dira txapelketan lanean.

Hiru hilebetez, 16 saio jokatuko dira Gipuzkoan barrena: zazpi final-zortziren, bost final-lauren, hiru finalaurreko eta finala. Lehen saioa Oñatiko Santa Ana Antzokian izango da, irailaren 14an. Hortik aurrera, ia astero izango dira saioak, fasetik faserako asteburuetan izan ezik.

Aurtengo Gipuzkoako Bertsolari Txapelketea abenduaren 14an amaituko da Donostiako Illunben egingo dan finalagaz; bertan, sailkatzea lortzen daben zortzi bertsolariek hartuko dabe parte.

Sarrerak eta jarraipena

Saio guztietako sarrerak eta bonuak irailaren 2an jarriko dira salgai www.bertsosarrerak.eus webgunean. Ohikoa dan legez, Bertsozale Alkarteko bazkideek prezio berezia izango dabe sarreretan. Era berean, Bertsozale Alkarteko bazkideek bonua eskuratu ahal izango dabe, finalerako ez beste saio guztietarako balio dauena.

www.bertsozale.eus webguneak Gipuzkoako Bertsolari Txapelketearen informazino osoa eta eguneratua eskainiko dau. Horrezaz gan, www.bertsoa.eus atariak txapelketearen jarraipen berezia egingo dau.

Sare sozialetan be Gipuzkoako Bertsozale Alkartearen profilen bitartez segimendua egingo jako Gipuzkoako Bertsolari Txapelketeari, #GBTX19 traolea erabiliz.