Su Ta Gar, Bebe, Huntza, C Tangana, Monica Naranjo eta La Moda Bilboko Aste Nagusian

Su Ta Gar | Ikusi handiago | Argazki originala

Bilboko Udalak Aste Nagusian Abandoibarrako eta Europa parkeko agertokietan joko daben lehenengo taldeak eta artistak nortzuk izango diran aurreratu dau. Abandoibarran 23:30ean hasiko dira kontzertuak eta Europa parkean, 00:00etan. Sutagar, Dúo Dinámico, Bebe, Mónica Naranjo Bilboko Orkestra Sinfonikoa, La Moda, Huntza eta C. Tangana dira Bilboko 41. Aste Nagusian izango diran musika-taldeetako eta bakarlarietako batzuk.

Sutagar euskal taldea izango da kontzertuei hasierea emongo deutsena, izan be, Abandoibarran joko dau zapatuan, abuztuaren 17an, 23:30etik aurrera. 1987an sortu zan heavy metaleko taldeak zutunik jarriko ditu ikusleak taldearen atzoko eta gaurko abestiakazekin.

Astelehenean, abuztuaren 19an, leku eta ordu berean, klasikoetan klasikoetako bat izango dogu: Dúo Dinámico. Talde ezagun honek era guztietako ikus-entzuleak batuko ditu Aste Nagusian, 60ko hamarkada gogorarazoko deuskun ikuskizunagaz.

Martitzenean, abuztuaren 20an, Abandoibarran, 23:30etik aurrera, Beberen txanda izango da, Malo eta Ella abestiei esker mundu-mailako ospea lortu eban aktore eta kantariaren txandea.

Abuztuaren 21ean, eguaztenean, jarraitzaile piloa dituan Mónica Naranjoren ahots hunkigarria Bilboko Orkestra Sinfonikoaren soinuakaz batera izango dogu, 23:30ean hasita, Abandoibarran; Europa parkeko aurtengo lehenengo kontzertua, ostera, Huntza taldearena izango da, 00:00etan. Huntza taldea Bilboko kaleetan sortu eben Unibersidadeko sei ikaslek 2014. urtean eta Aldapan gora abestiak emon deutse indarrik handiena.

Hurrengo egunean, abuztuaren 22an, 23:30ean hasita eta Abandoibarran, La Moda taldearen kontzertua izango da. Akordeoia, saxofoia, banjoa, mandolina eta klarinetea buztartzen dituan talde honek folk, country, punk eta rock and roll-etik edan dau eta ondorioa, zuzeneko indartsuak egiten dituan talde berezia.

Europa parkeko kontzertuetan, hurrengoa, abuztuaren 24an, zapatuan, amaituko da, 00:00etan. Boladan dagoan C. Tangana rapero, trapero eta reggaeton-kantariak kantauko dau.

Zortzi agertoki eta dobako 100 musika emonaldi baino gehiago

Aste Nagusiko jaietako publikoarentzat musika-eskaintzeak dauen garrantziaz jaubetuta, Udalak dobako 100 musika-ikuskizun baino gehiago antolatu ditu uriko 8 agertokitan; era guztietako kontzertuak izango dira, gaur-gaurkoak, musika klasikoa eta bilbainadak, besteak beste.

Musikako hitzorduen ardatza eta oinarria, Bilboko jai-ereduaren ezaugarriak izango dira: kalidadea, askotako eskaintzea, bardintasuna, parte-hartzea eta dobakotasuna.