Bertsolariak eta kulturgileak, buruz buru

Bizkaie! 2018-11-30 08:37   Bertsolaritzea

Zazpi liburutxudun kutxea da Lankuren argitalpen barria.

Proiektuan parte hartu daben bertsolari eta kulturgileetako batzuk (argazkia: Lanku) | Ikusi handiago | Argazki originala

Bertsolariak ezohiko moduan topauko ditu irakurleak Buruz buru lan barrian: Errimak eta doinuak albo batera itxita, patxadaz berbetan, gizarteko gaien, euren arduren eta sorkuntzearen inguruan. Zazpi bertsolari dira, eta bakotxa kulturgintzako bikotekide ezagun bategaz ipini dabe, barriketaldi mamintsuetan.

Zazpi liburutxu dira, kutxa baten danak batera datozanak. Hartu-emon konplize horreen emoitzea da liburuxka bakotxa, eta abiapuntu adina estilogaz egingo dozue topo atal batetik bestera zoazen neurrian, azaldu dabe Lankukoek. Hausnarketarako gai interesgarriak plazaratzen ditue zazpi bikoteek.

Era honetako argitalpen bat ateratzeko arrazoiak aitatu ditu Lankuk: Bertsolaria kulturgile sortzailea da, eta sortzen dau orain eta hemen dituan kezka eta ziurtasunetatik. Kezka eta ziurtasun horreek aldakorrak dira, eta, egokitu eta moldatu ohi dira inguruagaz hartu-emonean. Bertsolariak eta beste kulturgile batzuk (musikariak, aktoreak, zientzialariak, marrazkilariak...) alkarregaz sarri ikusi doguz oholtzan, baina truke hori papelera ekarri nahi izan dabe.

Sortzaileak aukeratzeko orduan, lurraldetasuna, generoa, edadea eta abar kontuan hartu ditue, ahalik eta abaniko zabalena osotzeko. Ganera, Malen Amenabarren ilustrazinoak sartu ditue argitalpenean.
 
Honeek dira zazpi bikoteak: Igor Elortza eta Joseba Sarrionandia; Uxue Alberdi eta Danele Sarriugarte; Julio Soto eta Gorka Urbizu; Nerea Ibarzabal eta Eneko Sagardoy; Andoni Egaña eta Ruper Ordorika; Onintza Enbeita eta Maite Berriozabal; eta Manex Agirre eta Ilaski Serrano.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa