'Blogetan! Blog izarren bila' lehiaketea martxan ipini dau Azkue Fundazinoak

| Ikusi handiago | Argazki originala

Blogari euskaldunen lanari oihartzuna emotea da lehiaketearen helburua, Azkue Fundazinoak azaldu dauenez. Era horretara, fundazinoaren ardatz biak buztartzen dira: Euskerea eta teknologia barriak. 2014an antolatu zan lehenengoz Blogetan! Blog izarren bila eta arrakastatsutzat jo eben antolatzaileek. Hortaz, 2017. urtearen hasikera honetan, bigarren edizinorako deia egitea erabagi dabe Azkuek eta Argiak.

Edonork parte hartu leike lehiaketan, euskeraz idatzitako bloga eukitea da baldintzea. Sariak emoteko orduan, lau kategoriatan banatuko ditue parte-hartzaileak: Kultura arloko blogak (zinemea, literaturea, artea, musikea, gastronomia, diseinua...); Gizartea eta politikea (kazetaritzea, historia, ekonomia, hezkuntzea...); astialdia (zaletasunak, kirolak, bidaiak...); eta zientzia eta teknologia.

Lehiaketan parte hartzeko, Blogetan webgunearen bidez izena emotea nahikoa da. Norberaren bloga edo beste batena apuntau leitekez. Urtarrilaren 16tik zezeilaren 13ra arte emon leiteke izena. Ondoren, interneteko erabiltzaleek botoa emon ahal izango dabe, sare sozialen bidez, eta epaimahaiaren eretxia be kontuan hartuko da. Holan, 12 finalista aukeratuko dira, kategoria bakotxeko hiru. Horreen artean, epaimahaiak erabagiko dau kategoria bakotxeko sari nagusia zeini emon.

Honeek egongo dira epaimahaian: June Fernandez blogari ohia eta Pikara Magazine aldizkariaren sortzailea; Joxe Rojas blogaria eta teknologia barrietan aditua; Zuzeu agerkari digitaleko Urko Uranga; Argiako kideak; eta Azkue Fundazinoko teknikari bi.

Argia aldizkariak, bere aldetik, euskal blogari barriaren saria emongo dau. Hainbat sari banatuko dira irabazleen artean, esate baterako Bernat Vidalek diseinautako garaikurra eta gailu teknolokoetarako erosketa-txekeak. Bilboko Euskerearen Etxean banatuko dira sariak, martiaren 30ean egingo dan ekitaldi baten.