Sustrai Colinarentzat izan da sari nagusia Rikardo Arregi XXVIII Kazetaritza Sarietan

| Ikusi handiago | Argazki originala

Rikardo Arregi Kazetaritza Sariak (RAKS) banatu ditue oraintsu eta XXVIII. edizino honetan Sustrai Colinarentzat izan da sari nagusia, Argia aldizkarian kaleratutako alkarrizketakaitik. Era berean, Kazetari Berria saria Unai Oiartzunek jaso dau, Irunero aldizkarian egindako lanagaitik. Sari nagusiari eta Kazetari Barriarenari 9.000 eta 3.000 euro jagokez, hurranez hurran, eta Xabier Lakaren eskulturea eta diplomea. Epaimahaiaren aitamen berezia, barriz, Amagoia Gurrutxaga kazetariarentzat izan da, Kristiane Etxaluz ekintzaileari egindako alkarrizketeari esker. Honi RAKSen logoaren serigrafia eta diplomea emon jakoz.

Ana Karrere Andoaingo alkateak, Patxi Baztarrika, Eusko Jaurlaritzako Hizkuntza Politikarako sailburuordeak eta sarituek hartu dabe berbea. Patxai Baztarrikak bertaratutakoei esan deutse pozik dagoala Rikardo Arregi Kazetaritza Sarien banaketa ekitaldian, euskal kazetaritzan, sariok mugarri bihurtu diralako. Eta, aldi berean, Rikardo Arregi ekintzaile saiatu eta kazetari barritzaile ha gogoan dogulako.

Aurten bete dira berrogeita hamar urte Rikardo Arregik berbaldi sutsu bat egin ebanetik Usurbilen, Udarregi bertsolariaren omenez jarritako eskulturearen aurrean. Aspaldi irakurri eta entzun neban berbaldi hori. Egunotan barriro entzuteko aukerea izan dot, Aiurriri esker. Euskerearen egoerari buruz dabil Rikardo berbaldi horretan. Eta gaur, Andoainen nabarmendu nahi izan dot, orduan Rikardok euskerearen ganean egin eban iragarpen ezkorra ezerezean geratu dala. Ondokoa inoan 1966ko giro eta egoera haretan euskerearen egoereari buruz: '...martxa honetan ez da izango, hemendik urte batzuetara, gauzak aldatzen ez badira behinik behin, euskeraz berba egingo dauenik'. Zorionez, gauzak aldatu dira ordutik hona, asko aldatu be. Egoerearen behatzaile zorrotza zan Rikardo, baina ez eban asmau handik bi belaunalditara euskereak izango eban egoerea antzematen. Zorionez. Baina, iragarpen haretan ez asmauta be, Rikardo euskaltzale handia ohoratu beharra dogu, izan be, bere iragarpena ez zan bete, besteak beste, berak eta bere belaunaldiko beste batzuek, ekinaren ekinez, euskereak gizartean behar eban lekua bereganatzeko jarri zituen oinarriei esker. Berbaldi haretan, euskerearen pronostiko ezkor haregaz batera, azaldu eban, baita be, zer egin beharko zan egoerearei bueltea emoteko. Adibidez, euskerea salbetako, ez eban nahikotzat joten euskerea gurasoek seme-alabei transmitidutea, gero ez bazan erabilten egunero-egunero irratietan, telebistan, egunkarietan, zinemetan eta abarretan.

Esan eta egin. Ekintzailea zan Rikardo. Hain zuzen be, bera izan zan urtebete lehenago, 1965ean, euskeraz alfabetetako egin zan lehenengo kanpainea abian jarri eban taldeko bultzatzaile nagusia. Jarraian etorri ziran alfabetetakoak ez eze euskalduntzekoak bere, euskerea ikasi nahi eban jentearen eskariari erantzunez. Euskerazko kazetaritzea egiten eta sustatzen be buru-belarri ibili zan, barritzailea izan zan horretan be.

Euskereak behar-beharrezkoa dau familia eta lagun giroaren aterpea. Baina garbi eukan hori ez zala nahikoa; behar ebala, ganera, gizarte jarduera guztietara hegoak zabaldu; behar ebala hizkuntza kultu bihurtu. Eta horretarako euskaldun alfabetauak behar zituala. Eta behar zirala sortu euskerazko hedabideak, gau eskolak eta ikastolak. Euskereak, Euskal Herriko gizarte modernoan etorkizuna izateko.

Ohoratu beharra dogu Rikardo Arregi, eta ohoratu bere belaunaldiko hainbat euskaltzaleren etorkizun-sena, argirik bako tunel ilun haretan etorkizunari begira jarteko izan eben gaitasuna eta kemena.