'Francofonia, le Louvre sous l’Occupation'

| Ikusi handiago | Argazki originala

- Zuzendaritza, gidoia eta musikea: Alexander Sokurov.

- Aktoreak: Louis-Do de Lencquesaing, Vincent Nemeth, Benjamin Utzerath, Johanna Korthals Altes, Jean-Claude Caër, Andrey Chelpanov.

- Produktoreak: Idéale Audience / Musée du Louvre.

- Generoa: Historia, artea, nazismoa, dokumentala.

- Herrialdea: Frantzia.

- Iraupena: 87 min.

- Balorazinoa: 3/5

Ikusle guztientzat egokia izan ez arren, Alexander Sokurov zinemagile errusiarra originala, esperimentala eta ausarta da. Arka errusiarra-gaz, San Petersburgoko Hermitage museoan plano-sekuentzia bakar baten bidez filmautako pelikuleak zurtz eginda itxi gintuan. Ondoren, Urrezko Lehoia irabazi eban Veneziako Mostran Fausto klasikoaren bersino barri bategaz. Eta orain  Bigarren Munduko Gerran girotuta dagoan lan bitxi honegaz jatorku, Francofonia, le Louvre sous l’Occupation, artean arretea jarten duena.

Filmak ondoko istorioa kontetan deusku: XX. mendeko 40 hamarkadearen hasieran, Pariseko Louvreko museoa gerratik salbetako asmoz, arerio diran bi gizonen artean eregiten diran hartu-emonak. Bide batez, pinakoteka erraldoi horren historia erakusten jaku.

Datu asko eskaintzen dituan offeko ahotsak gidatzen gaituen bitartean, artxiboko irudiak eta jazoera historikoetako aktoreen bidezko berreregiteak ikusten dira. Saiakeratik hur dagoan pelikuleari trinkotasuna kentzeko asmoz, umore tanta batzuk sartu ditu zuzendariak.
 
Edozelan be, edukia oso interesgarria izan arren, tarteka aspergarria egiten da; nahiz eta ordu eta erdiko iraupena izan, luzeegia egiten jaku.