Bertsolari Gazteen BBK Txapelketako finala jokatuko dabe gaur Hego Uribek eta Busturialdeak

Bizkaie! 2016-03-18 10:52   Bertsolaritzea

Zezeilaren 17an hasi zan, Igorren, Bizkaiko Bertsolari Gazteen BBK Txapelketearen 24. edizinoa. Gaur, martiak 18, finala jokatuko da Bilbon, arratsaldeko 19:00etan. Zortzi eskualdek parte hartu dabe aurten eta, bina kanporaketa irabazita, Hego Uribeko eta Busturialdeko seikoteak lehiatuko dira azken saioan.

Hego Uribek Lea-Artibairen aurka jokatu eban lehenengo kanporaketea, Markina-Xemeinen. Ondoren, Zallako finalaurrekoan, Uribe Kostako taldea euki eban aurrez aurre. Saio bietan puntuazinorik altuena lortuta, Hego Uribek finalerako txartela lortu eban.

Busturialdeak, ostera, Arratia itxi eban kanpoan, Igorren jokatutako kanporaketan. Finaurrekoan, Arratzun, Durangaldeari irabazi eutsan eta holan lortu eban finalean lekua egitea.

Aurten sekula baino parte-hartze handiagoa egon da BBK Txapelketan. Izan be, Uribe Butroeren nobedadeari esker, zortzi eskualde egon dira lehian, Bizkaiko txoko guztietakoak. Sariketearen lehenengo edizinoan, 1992an, bost eskualdek baino ez eben izena emon eta, harrezkero, hazten joan da kopurua.

Kanporaketetan legez, finalean be, kategoria bitan banatuko ditue bertsolariak. Eskualde bakotxak hiru bertsolari izango ditu kategoria bakotxean, seina neska-mutil beraz. A mailan 18 urtera artekoak sartzen ditue eta B mailan, 24 urtera artekoak.

Maila bietako ariketa guztietako puntuazinoak batuta (agurretakoak izan ezik), irabazlea zein dan erabagiko da. Ganera, txapelketan bizkaierea ondoen erabili dauen bertsolariari be saria emongo deutsie. Honeek izango dira finaleko epaileak: Alaitz Etxanobe, Leire Etxebarria eta Miriam Juaristi.

Bilboko Kafe Antzokian jokatuko da finala, 19:00etan. Sartzea doban da eta antolatzaileek bertara hurreratzeko deia egin deutse zale guztiei. BBK Fundazinoa, Bizkaiko Ikastolen Alkartea eta Bizkaiko Bertsozale Alkartea dira txapelketearen bultzatzaileak.

Ikusi argazki guztiak handiago