Joshua A. Fishman hizkuntzalari eta ohorezko euskaltzaina hil da

| Ikusi handiago | Argazki originala

Domekan, martiaren 1ean, hil zan Joshua Fishman hizkuntzalari ezaguna, 89 urte zituala. Euskal Herrian batez be hizkuntza-soziologiaren aitzindari lez ezaguna bada be, jakituria-eremu zabalagoak landu zituan. Hizkuntza gitxituen gainbeherea eta bizirik irauteko arazoak hobeto ulertzeko, beste hainbat hiztun-alkarte ahul edo txikiren egoerea aztertu eban mundu osoan. Hizkuntzotako bat euskarea izan zan.  Euskaltzaindiak ohorezko euskaltzain izentau eban, 2010eko urtarrilaren 29an. Euskerearen egoerea berak idatzitako hainbat liburutan jaso eban, berbarako, Reversing Language Shift lanean.

Joshua Fishman New Yorkeko Yeshiva unibersidadeko ikerketarako katedradun emeritoa zan. Bere ikergaien artean egozan: hizkuntza-soziologia, hizkuntza eta etnizidadea, hizkuntza-plangintzea, hezkuntza elebiduna, yiddish hizkuntzea eta antropologia medikoa. Lehenengo lau arloak dira euskerearentzat interesgarrienak.

Idazle eta irakasle emonkorra izan zan, bai bakarkako lanean eta bai berak bultzatutako lantalde ugarietan. Berak sortu eban International Journal of the Sociology of Language aldizkaria. Makinatxu bat libururen egile edo bildumagile izan zan: Language Loyalty in the United States (1966), Bilingualism in the Barrio (1968), Language & Nationalism: two integrative essays (1972), The Rise and Fall of the Ethnic Revival (1985), Reversing Language Shift: Theory and Practice of  Assistance to Threatened Languages (1991), In Praise of the Beloved Language; The Content of Positive Ethnolinguistic Consciousness (1997) eta DO NOT Leave Your Language Alone: The Hidden Status Agendas Within Corpus Planning in Language Policy (2006).

Hiztun-alkarte txiki bateko hiztuna zan, yiddish hizkuntzearenna, hain zuzen be.  Egoera antzekoak egozan hizkuntzak aztertu zituan, tartean, euskerea. 1980an etorri zan Euskal Herrira herrira lehenengoz. Ikastaroak eta berbaldiak emon zituan gurean: Hizkuntza-plangintzazko jardunaldian, Euskal Mundu Biltzarrean, Euskal Eskola Publikoaren lehen kongresuan eta abar. Sari ugari jaso zituak, berbarako,  UNESCOk 2004 urtean emon eutson Linguapax saria.