Lekuek jaialdiak musikaz beteko dau Gernika martiaren 9tik 16ra bitartean

| Ikusi handiago | Argazki originala

Gernikako musikari eta musikazaleak bat egin dabe Lekuek izeneko jaialdia antolatzeko. Halanda ze, martiaren 9tik 16ra bitartean, makinatxu bat jarduera izango dira aukeran herriko hainbat espaziotan, tartean Audience, Marlango, Gari, Ruper Ordorika eta Atom Rhumbaren zuzenekoak.

Kontzertuak antolatzeaz aparte, musikea eta kulturearen inguruko eztabaidea, ideien trukea eta hartu-emon sare barriak sortu nahi ditue. Horregaitik, zuzeneko emonaldiekaz batera, mahai-inguruak, topaketak eta tailerrak atondu dira. Hainbat espazio, estilo, egiteko modu batzen dituan festibala da Lekuek, dinoe antolatzaileek. Ekimena zaletasunetik abiatzen da, behetik gorakoa dala nabarmentzen dabe, era parte hartzailean landutakoa, edegia, alkarlanean oinarritutakoa, autentikoa.

Lekuek jaialdiak izaera deszentralizaua dauka, leku edo eragile bakoitxak erabagi dau zein talde ekarri eta zelan antolatu jarduerea. Lehenago aitatutako musikariez gan, ondoko honeek be joko dabe Gernikan: Mursego, Estricalla, Esne Beltza, Porco Bravo, Dead Bronco, Malcolm Holcombe, Napoka Iria, Sarkor, El_Txef_A, Dawn of the Maya, Tea Party Dj's, Hide Abbey, Aquarius Heaven, Thirteen Blood Promises, Undo, Bullets of Misery eta Naica

Gernikako makinatxu bat lekutan izango da jaialdia, besteak beste, Trinkete antitxokoa, Astra, Iparragirre alkarteko lokalak, Lizeo Antzokia eta Juan Kaltzada kaleko tabernetan.

Daborduko bonuak salgai dagoz, 20 euroan. 500 atera ditue, eta martiaren 9ra arte erosi ahal izango dira, lehenago amaitzen ez badira. Bonuak emonaldi guztietara joateko aukerea emoten dau. Ondoko lekuetan erosi daitekez bonuak: Astra, Arima, Arrano, Aterpe, Atxur, Irrintzi, J&B, Lagun Etxea, Ospa, Zeppelin eta Lizeoan. Interneten bere bai, hemen.