La Tarrancha taldeak hizkuntz aniztasuna aldarrikatzen dauen 'Mezillingües' diskoa aurkeztuko dau Gernikan

La Tarrancha taldeak hizkuntz aniztasuna aldarrikatzen dauen Mezillingües lanaren zuzeneko aurkezpena egingo dau Gernikako Lizeo Antzokian datorren barikuan, urtarrilaren 31n. Enbor bereko zazpi hizkuntza eta 19 kolaborazino batzen dituan diskoa da ska-fusino taldeak aurkeztuko dauena.

Iberiar peninsulan egun existiduten diran asturiar-leonerea, aragoierea, katalana, gaztelerea, euskerea, okzitanierea eta galaiko-portugalerea eta beren aldaerak dira La Tarrancha talde asturiarrak Mezillingües diskoan batu dituanak, Gernika-Lumoko Udaleko iturriek jakinarazo dabenez.

Estilo nahasketea izanik taldearen ezaugarri nagusia -jamaikar estiloa, umorea eta panfletismotik urrun dagoan hausnarketa kritikoa-, La Cuenca'l Nalon eta Xixon taldeetako partaideakaz sortu zan La Tarrancha 2003. urtean. 2012an aurkeztu eben Mezigayuska izeneko hirugarren diskoa, eta lan horri buelta bat emon eta berreregi gura izan dabe orain.

Horretarako, euren berezko hizkuntzea erabilten daben hainbat musikarik eurekaz bat egin dabe, besteak beste, Ines Osinaga (Gose), Jesus Cifuentes (Celtas Cortos), Guillerme (Quempallou), Alide Sans okzitaniarra, Asturiesko rock talde askoren partaideak, Pica Tümilho, Tarna eta Gaire taldeak. Danetara, 19 ahots batu dira, helburu bakar bategaz: hizkuntz errealidade desbardinei argia emotea eta beren hizlarien eskubideak defendidutea.

Mezillingües lanak Mezigayuska diskoko abestietatik harago joan nahi dau, eta horretarako Ö-3-3 bigarren lanaren hiru bersinoak eta De Tazones a Candás asturiar tabernetako hainbat abestien bersinoa be sartu ditue.

Mezillingües diskoaren lehenengo eszenaratzea urtarrilaren 31n izango da, Gernikako Lizeo Antzokian. Gainera, kolaboratzaile berezi bat izango da bertan, izan be, Gose taldeko Ines Osinagak Bide okerretik (Pel mal camin berreginda) abestuko dau.

Ikusi argazki guztiak handiago