Etxahun Lekuek irabazi dau Oiongo azken kanporaketea eta Tolosako finalaurrekorako txartela lortu dau

Etxahun Lekue larrabetzuarrak irabazi dau bizkaitarrak nagusi izan dituan Oiongo kanporaketea eta hurrengo faserako zuzeneko txartela eskuratu. Honako puntuazioa lortu dabe bertsolariek:

Etxahun Lekue: 638
Miren Amuriza: 628,5
Iratxe Ibarra: 627,5
Eneritz Zabaleta: 595,5
Maddi Sarasua: 579
Manex Agirre: 578

Oionen lehen postua lortuta, Lekue zuzenean sailkatu da finalaurrekoetarako eta zemendiaren 10ean Tolosan jokatuko dan bigarren finalaurrekoan kantauko dau. Saioko puntuazinoari erreparauta, Etxahun Lekue da finalaurrekoetarako sailkatu dan bertsolari bakarra.

740 bertsozale alkartu ziran joandako zapatuan Oioneko Arroyo I pilotalekuan. Antolatzaileek beren-beregi eskertu gura izan dabe Oiongo udalak eta herriko Txandrio bertso eskoleak saioa antolatzeko emon daben laguntzinoa. Oionen Txapelketa Nagusiko saioa antolatzea Bertsozale Elkarteak apropos hartu dauen erabagia izan da. Patxi Aizpuru Arabako Bertsozale Elkarteko idazkariak gogora ekarri dauen moduan, Txapelketako herriak ez dira gogoeta barik aukeratzen. Inguru bertsozale euskaldunak, ez hain bertsozaleak, euskereak indar gitxiago dauen herriak… danetik batuko ditu txapelketeak. Zazpi herrialdeetan, Euskal Herri osoan dabilz beharrean Bertsozale Elkartea eta beste eragile asko alkarlanean eta txapelketa nagusia erabili nahi da dinamikea indartzeko. Azken hiru-lau urteetan Txandrioko bertso eskoleak jarritako oinarriari bultzadatxua emotea zan asmoa eta polito bete da.

Azken kanporaketea izan da Oiongoa eta horrenbestez finalaurrekoetan ze bertsolarik kantauko daben erabagita gelditu da, baita finalaurrekoen osoketea be.

Finalaurrekoetarako sailkatuak:

1. Agin Laburu* 699,5

2. Beñat Gaztelumendi* 695,5

3. Igor Elortza* 679

4. Jone Uria 677

5. Jexux Mari Irazu 666

6. Jon Martin* 654

7. Alaia Martin 653

8. Julio Soto* 653

9. Xabier Silveira 652,5

10. Unai Agirre 650,5

11. Beñat Lizaso 643

12. Amaia Agirre 642,5

13. Nerea Elustondo 639,5

14. Etxahun Lekue* 638

15. Jokin Uranga 638

16. Iñigo Mantzizidor 632,5

17. Odei Barroso 632

18. Fredi Paia 628,5

*Kanporaketetako irabazleak

Finalaurrekoak

Finalaurrekoetarako zuzenean sailkatuta egozan orain dala lau urte kantau eben sei bertsolarik: Aitor Mendiluze, Aitor Sarriegi, Amets Arzallus, Jon Maia, Sustrai Colina eta Unai Iturriaga.

Kontuak kontu, astebeteko deskantsuaren ondoren, finalaurrekoak ondokoak izango dira:

- Zemendiak 9, Gernika-Lumo: Amets Arzallus, Jon Martin, Julio Soto, Jone Uria, Nerea Elustondo eta Jokin Uranga.

- Zemendiak 10, Tolosa: Unai Iturriaga, Igor Elortza, Etxahun Lekue, Jexux Mari Irazu, Amaia Agirre eta Iñigo Mantzizidor Mantxi.

- Zemendiak 16, Oiartzun: Aitor Sarriegi, Jon Maia, Agin Laburu, Alaia Martin, Beñat Lizaso eta Odei Barroso.

- Zemendiak17, Murgia: Aitor Mendiluze, Sustrai Colina, Beñat Gaztelumendi, Xabier Silveira, Unai Agirre eta Fredi Paia.

Finalaurrekoak bi itzulitara jokatuko dira. Bigarren itzulira saio bakotxeko irabazlea eta hamalau puntuazinorik onenak pasauko dira. Bigarren itzuliko finalaurrekoak Elizondon, Donostian eta Maule-Lextarren jokatuko dira zemendiaren 23an, 24an eta 30ean.

Finalaurreko guztietarako zein finalerako sarrerak dagoeneko salgai daude www.bertsosarrerak.eu webgunean.

Ikusi argazki guztiak handiago