'Sukaldatu' elikadura osasungarria bultzatzeko ekimena abian da

Basque Culinary Centerrek eta Ikastolek Alkarteak Sukaldatu izeneko proiektua martxan ipini barri dabe. Proiektuaren helburua familiarteko sukaldaritzea sustatzea da, eta familiaren barruan elikadura osasungarria bultzatzea. Alkarregaz jatekoa egitea eta jatea familiaren eta familia-hazkuntzaren funtsezko elementuak dirala uste dabe ekimenaren arduradunek. Egitasmoak Eroski enpresearen babesa dauka.

Sukaldatu proiektuaren bidez sukaldaritzeak hainbat arlotan dauen eragina nabarmendu nahi dabe. Osasuna, familiarteko loturak, kultura soziala eta, tokiko produktuen bidez, tokiko aberastasuna sustatzea dira lantzen diran arloetako batzuk. Osasunari jagokonez, garrantzi handikoa da sukaldaritzan jarraibide osasungarriak betetea, dinoe, esaterako, menuak ondo antolatzea eta produktu freskoak erabiltea, eta sukaldaritzeari denporea emotea. Ezin dira bereizi jateko ekintzea eta, horren aurretik, jatekoa prestetakoa, ezta sukaldatzekoa eta taldean jatekoa, batez be familiartean, ganeratu dabe.

Proiektuaren asmoa da euskal ikastoletako neska-mutilek kontzientzia hartzea sukaldaritzearen eta elikadura orekatuaren garrantziaz, eta familiek be bai. Sukaldatuk hiru ardatz ditu: ikastolea, familia eta dendak. Jatekoa eginez, elikagai freskoak aukeratzea, oso industrializauta ez dagozan produktuak konsumidutea eta alkarregaz jatekoa prestetako denporea hartzea dira sukaldaritza osasungarriaren eta osasun onaren oinarriak, BCCko arduradunen esanetan

Hezkuntza-proiektu honek hiru arlotan eragingo dau: Ikastolei (ikasleei eta irakasleei) elikadura osasungarriari buruzko unidade didaktikoak, material dibulgatiboa eta elikadureagaz lotutako eskolaz kanpoko jarduerak eskainiko jakez. Jarduera horreek ikastolan bertan gurasoen prestakuntzeagaz eta tailerrekaz osotuko dira: menuak, elikagaiak, askariak… Azkenik, Eroski dendetan material dibulgatiboa, jarduerak eta produktu espezifikoak izango dira elikadura osasungarriaren inguruan. Hau danau antolatzeko, BCCk sukaldari eta nutrizionista talde bat eratu dau.

Sukaldatu ekimenak emon ditu daborduko lehenengo pausuak, Oñatiko Txantxiku, Portugaleteko Astileku eta Elorrioko Txintxurri Ikastoletan, hain zuzen be.

Ikusi argazki guztiak handiago