Etxepareren Linguae Vasconum Primitiae galego, katalan, errumaniera, arabiera, txinera eta kitxuara itzuliko da

| Ikusi handiago | Argazki originala

Bernat Etxeparek idatzitako Linguae Vasconum Primitiae euskaraz argitaratu zan lehenengo liburua galiziera, katalan, errumaniera, arabiera, txinera eta kitxua hizkuntzetara itzuliko da, Euskaltzaindiak eta Eusko Legebiltzarrak sinatutako lankidetza-hitzarmenari esker.

Eusko Legebiltzarreko Mahaiak, martiaren 26an egindako bileran, eta Euskaltzaindiak eta Eusko Legebiltzarrak sinatutako lankidetza-hitzarmenaren barruan, Etxepareren Linguae Vasconum Primitiae lanaren itzulpena egitea onetsi eban.

2011ko abenduaren 2an Eusko Legebiltzarrean aurkeztu zan Etxepareren bertsoak jasoten dituan euskerazko jatorrizkoaren faksimile-edizino bat, bai eta hainbat hizkuntzatara egindako itzulpena be, hain zuzen be, espainiera, ingeles, frantses, aleman eta italierara.

Oraingoan erabagi da testua euskal gizartean presentziarik handiena daben komunidade linguistikoen hizkuntzetara be itzultzea, hain zuzen, galiziera, katalan, errumaniera, arabiera, txinera eta kitxua hizkuntzetara.

Andres Urrutia euskaltzainburua Eusko Legebiltzarreko lehendakari Bakartxo Tejeriarekin batu zan joan dan urtarrilaren 22an, eta orduan jakinarazo eutson helburu hori, bi erakundeen arteko lankidetza-hitzarmenaren garapen moduan.

Era berean, mahai gainean jarri zituen aztertzen dabilzan hainbat ekintza, bi erakundeen arteko lankidetzea sendotzeko, euskerearen sustapenaren eta erabilerearen arloan lanak bultzatzeko helburuagaz. Urtarrilean izandako bilerearen egun berean, Euskaltzaindiko Zuzendaritzako kideek ohiko bilerea egin eben Eusko Legebiltzarrean, eta euskerearen arloko aholku-erakundearen osoko bilkurearen bilerea bagilaren 28an Eusko Legebiltzarrean egitea be onartu zan.

Osoko bilkureak normalean hilaren azken barikuetan egiten dira Euskaltzaindiaren Bilboko egoitza nagusian, baina ez da ezohikoa euskal uriburuetako egoitza instituzionaletan be batzea. Eusko Legebiltzarrean lehenengo aldiz batuko da Euskaltzaindiaren osoko bilkurea.