Gaur UPV/EHUko errektorea aukeratuko dabe

| Ikusi handiago | Argazki originala

Gaur, abenduak 4, UPV/EHUko kideek errektorea aukeratzeko hauteskundeetako botazinoa egingo da. Danetara, 51.643 lagun dagoz deituta botoa emotera: irakasleak, ikasleak eta administrazino eta zerbitzuetako langileak.

Errektorea sufragio unibersal haztatuaren bidez hautatzen da. Unibersidadeko komunidadea osotzen daben 51.643 petsona bost taldetan banatzen dira: unibersidadeagaz lotura iraunkorra daben 2.239 irakasle doktore; unibersidadeagaz lotura iraunkorra daben 500 irakasle ez doktore; ganerako 2.779 irakasle eta ikertzaile; ikasle eta administrazino eta zerbitzuetako 1.884 langile. Esan bezela, botoa haztatua da: irakasle doktore iraunkorrei % 56,25 jagoke; irakasle iraunkor ez-doktoreei, % 7,50; ganerako irakasle eta ikertzaileei, % 2,09; ikasleei % 22,08; eta, azkenik, administrazino eta zerbitzuetako langileei, % 12,08.

Hauteslekuak 9:00etatik 18:00etara egongo dira zabalik. Irakasleek eta ikasleek kasuan kasuko ikastegian emon behar dabe botoa, eta irakasle iraunkor ez-doktore, ganerako irakasle eta ikertzaile eta administrazino eta zerbitzuetako langileek jagoken campusean. Danetara, 59 hauteskunde-mahai eratuko dira, 9 Araban, 29 Bizkaian eta 14 Gipuzkoan. Kide batzuek dagoeneko botoa emon dabe, bai aldez aurretik botoa emonda, bai boto elektronikoaren bidez.

Aurreikuspenen arabera, Jon Irazustak, Hauteskunde Batzordearen buruak, 20:30ak aldera emongo ditu errektorea aukeratzeko hauteskundeetako behin-behineko emoitzak Bizkaiko Aretoko Baroja aretoan (Abandoibarra 3, Bilbo, 2. solairua) egingo dauen agerraldian.

Hautagai bakarra Iñaki Goirizelaia danez, aldeko botoa edo boto zuria besterik ezin izango da emon. Hautagai hori hautetsia izateko, nahikoa izango da emondako botoen herena lortzea, egin beharreko haztapenak eginda. Hauteskundeen behin betiko emoitza abenduaren 17an aldarrikatuko da, inpugnazinoetarako epea behin amaitu ondoren.