Kontseiluak euskeraz biziteko eskubidea aldarrikatuko dau abenduaren 1ean Donostian

| Ikusi handiago | Argazki originala

Osasun arloan euskeraz bizi nahi daben hainbat herritarrek eta Kontseiluko idazkari nagusi Paul Bilbaok agerraldia egin dabe Bilbon. Erabiltzaile eta profesionalek euskeraz bizi ahal izateko egindako ahaleginak autortzeko eskatu deutse Administrazinoari. Euskeraz biziteko nahia abenduaren 1ean Euskaraz bizi nahi dugu lemapean Donostian egingo dan manifestazinoan aldarrikatuko dala aurreratu dabe, eta herritarrei parte hartzeko deia egin deutsie.

Euskeraz bizi ezin daben herritarren lekukotasunak erakutsi ditue prentsaurrekoan. Egunero bizi dau euskaldunak gitxiagotua izatearen sentipena, ezintasun egoerak bizitea, arraro sentidutea… Atzerritarrak sentiarazoten gaitue gure herrian, esan dau Paul Bilbaok. Guraso guztiek nahi dabe euren seme-alabentzat onena. Eta euskeraz bizi nahi dogunontzat, onena nahi izatearen barruan kokatzen da, ezinbestean eta modu naturalean, euskeraz bizitea, ganeratu du Kontseiluko arduradunak.

Euskeraz biziteko nahia dauken herritarrek taldea osotzen dabe, ez gagoz bakarrik. Halan be, zoritxarrez euskeraz bizi ahal izatea ez dago euren esku, Admnistrazinoa be badauka erantzukizuna, eta eurei jagoke, Kontseiluko buruaren eretxiz, egoereari konponbidea emotea. Osasun arloan lez, bestelakoetan be antzeko egoerea bizi dabe euskaldunek. Horregaitik, abenduaren 1eko manifestazinoa bitartean, astero, kasu barri bat aurkeztuko dau Kontseiluak, arlo bakotxeko gorabeherak salatzeko.

Osasunaren garrantzia azpimarratu dau Bilbaok. Hurreko hartu-emon dauke osasun zerbitzuko langileak eta herritarrak, oso garrantzitsua da herritarrak harremon hori bere hizkuntzan egin ahal izatea. Eta ez dogu ahaztu behar, eskubidea be badala, adierazo dau. Sarritan salatu dau euskalgintzeak osasunean ez durala euskaldunen eskubideak, eta orain dala egun gitxi berretsi egin dau Europako Batzordeak Euroitunaren hirugarren balorazinoan.

Osakidetzako euskera plana Araba, Bizkaia eta Gipuzkoako euskerearen lege onartu eta hogei urtera egin zan. Euskaltzale askok plana nahikoa ez zala eretxi eutsen, baina gitxi hori be ez dala beteten nabarmendu dabe. Bide honetatik ez dogu osasun arloan euskalduntzea bermatuko eta ondorioz, euskaldunon hizkuntza-eskubideen urraketea betikotu egiten da.

Paul Bilbaoren esanetan, arrazoi ugari daukaguz abenduaren 1ean euskeraz bizi nahi dogunok gure aldarria kalean egiteko, euskaldunok ez dogulako nahi bigarren mailako herritar izatea. Abenduaren 1eko manifestazinoa Donostian izango da, hain zuzen be Anoetatik urtengo da 17:00etan.