Euskara 21 batzorde-atalak Euskerea Sustatzeko Ekintza Plana atondu dau

| Ikusi handiago | Argazki originala

Euskara 21 batzorde-atalak azken ukutuak emon deutsoz bart Euskerea Sustatzeko Ekintza Planari (ESEP). Orain, euskerearen erabilerea areagotzea helburu nagusi dauen Plana Euskerearen Aholku Batzordeak aztertu eta onartuko dau, eragozpenik ez bada behintzat, datorren astean egingo dauen osoko bilkuran.

Euskerea Sustatzeko Ekintza Plana azken hileotan atondu dabe Euskerearen Aholku Batzordearen gidaritzapean eta gizarteko eragile askoren laguntzinoagaz. Plan barriak jarraipena emongo deutso azken 12 urteetan euskerearen normalizazinoan eta hizkuntza politikan erreferentzia nagusia izan dan Euskerea Bizibarritzeko Plan Nagusiari (EBPN).

Kontuak kontu, Euskera 21 batzorde-atalak Planari azken ukutuak emon deutsoz eta, orain, Euskerearen Aholku Batzordeari jagoko ha aztertzea. Datorren astean, garagarrilaren 18an, Gasteizen egingo dauen osoko bilkuran jorratuko dabe eta, ezelako eragozpenik ez badago, onartu egingo da, Eusko Jaurlaritzako Kultura Sailetik adierazo dabenez.

Euskerea Sustatzeko Ekintza Planak datozen hamar urteetako hizkuntza plangintzea arrakastaz gidatu nahi dau eta euskerearen erabilerea areagotzea dau helburu. Plana eguneroko errealidadera egokituta dago eta hiru helburu estrategiko batzen ditu bere barruan: euskerearen jabekuntzea, erabilerea eta elikadurea, hau da, hizkuntza aberastasuna handitzeko behar diran izapideak eta eguneroko esparru guztiak hartzen ditu: irakaskuntzea, administrazinoa, lan-mundua, hedabideak, kirola eta aisia, kulturea, publizidadea eta abar. Teknologia barriei be aparteko garrantzia emon jake.

Bestalde, Euskera 21 batzorde-atalaren bilkurea hasi aurretik, Euskerea Sustatzeko Ekintza Planaren irudia aukeratzeko antolatu dan logotipo-lehiaketearen irabazlea ezagutzera emon da. Lehiaketara aurkeztu diran 36 logotipoetatik, Loinaz Lekuona Izagirre 22 urteko gazte donostiarraren lana aukeratu dabe. Egileak 1.500 euroko saria jaso dau eta harek egindako irudia aurkeztu da, Blanca Urgell Kultura sailburua bertan zala.