Euskerazko karrera amaierako proiekturik onena sarituko dau bigarren urtez Mondragon Unibersidadeak

| Ikusi handiago | Argazki originala

Mondragon Unibersidadeak Euskerazko karrera amaierako proiekturik onena sariaren bigarren edizinoa antolatu barri dau, Mondragon Korporazinoagaz batera. Euskeraz aurkeztutako karrera amaierako proiektu kopurua handitzea da ekimenaren helburu nagusia, eta holan unibersidade-enpresa hartu-emonetan euskerearen normalizazinoa sustatzea.

Mondragon Unibersidadeko ikasleen eta ikasketen irakas-hizkuntza euskerea izan arren, urtero aurkezten diran karrera amaierako 300 proiektuetatik % 25 besterik ez da euskeraz idazten, azaldu dabe unibersidadeko iturriek. Igaz, 17 proiektu aurkeztu ziran, eta HUHEZIko Psikopedagogiako ikasle Irantzu Portillok gradu amaierako Erresilientzia goiztiarra haurraren garapenean lanari esker irabazi eban 2.000 euroko saria.

Bigarren edizinoan Mondragon Korporazinoko enpresetan eta erakundeetan karrera amaierako proiektuak garatzen eta euskeraz aurkezten dituen Mondragon Unibersidadeko ikasleek bakarrik parte hartu ahal izango dabe. Dana dala, HUHEZIko ikasleek Korporazinokoak ez diran enpresetan egindako proiektuak aurkeztu ahal izango ditue.

Euskerazko karrera amaierako proiekturik onena sariko epaimahaiak, proiektuaren kalidadeaz aparte, euskerearen kalidadea be balorauko dau. Lehiaketara aurkezteko epea iraileko deialdiaren proiektuak aurkeztu ondoren amaituko da. Epaimahaiak da abenduaren 3an jakinarazoko dau irabazlea, Euskerearen Nazinoarteko Egunean, hain zuzen be.