'Bertso jarriak entzun gura dauzanarentzat jarriak'

| Ikusi handiago | Argazki originala

Lehenengo beharra: urte barri on danoi! Oraindino Erregenak geratzen jakuz, baina Gabonak be apurka-apurka aurrerantza doaz. Bada, Zeanuriko Gabonetako Aste Kulturalean, Gabon zahar bezperan, bertsoek be euren lekua euki eben eta bertako ahapaldiak Bizkaie!-ko orrietaraino ekarrita ekin gurako neuskio urte barriari. Bertso jarriak entzun gura dauzanarentzat jarriak tituluagaz herriko makinatxo bat bertsolariren bertsoak kantau ziran Zeanuriko Kultur Etxean: Eñaut Intxaurragarenak, Iñaki Iturriotzenak, Iñaki Lasarenak, Jabier Olibaresenak eta Irati Astondoarenak.

Bertso-sorta danak ez, baina batzuk egun horretarako beren-beregi egindakoak izan ziran. Bertsook egileen eta Esti eta Olatz kantarien ahotik be entzun ebezan Kultur Etxera -jentez josita egoan- bertaratu ziranek. Nik danak lortu dodaz -eskerrik asko Iñaki Iturriotzi-, baina bertso asko dira eta goitik behera dingilizka, txorizo-txortea legetxe, polito ez diranez paretan, gaur hiru sorta ipiniko dodaz. Enparadukoak 2012a akabau baino lehenago leidu ahal izango dozuez.

Bertsoak leiduten hasi baino lehenago, kontutxo bat: Erregen eguna aitatu dot artikulu hasieran eta neuk be badaukat erregalu bat zuentzat. Bizkaie!-n egin eustien alkarrizketan ze kotxe gustetan jatan kontau neutsuen eta, loteria tokau ezkero, horixe erosiko nebala. Txakur txikirik ez jat tokau, baina, herejiak egin eta gero, hortxe nago nire kotxe galantaren ondoan. Giltzak baino ez jataz falta eta hile honen 6ra orduko topauko baneukez, emongo geunke bueltatxo bat.

Hasierako agurra

Doinua: Treneko koplak, Karidadeko benta.

Arrasti on danori
ondo etorriak!
idatzita dakaguz
bertso jarriak: (bis)
entzun gura dauazan
horri jarriak.

Batetik gatoz sasi-
bertsolariak,
eta bestetik kriston
musikariak. (bis)
Zorroztu zuen begi
ta belarriak.

Gu gaur inprobisetan
ez gara hasiko,
behingoagatik trankil
gatoz ze kristo! (bis)
papelean dagona
kantau ta listo!

Eskaera bat egin
behar jatzue:
babes apur bat emon
behar deuskuzue, (bis)
errepikapenetan
lagundu eixue.

Proba bat egin behar dot
bai, bai parkatu:
hurrengo bost silabak
errepikatu, (bis)
baina ez barrurako,
baizik ta altu.

Benga beste behin abots
danak batuta
kantatu daigun danok
badakigu-ta, (bis)
hobetzen joango gara
apurka-apurka.

Biztu nahi doguz zuen
emozioak.
Honetxek dira gure
intentzioak, (bis)
on egin daixuela
gaurko saioak.

Eñaut Intxaurraga

Gure burka

Doinua: Ia guriak egin du

Sortatxo bat bertso berri
orain nahi nituzke jarri,
Euskal Herrian sarri
baikabiltza elkarri
mokoka edo muturka.
Horixe da gure burka.

Bakoitzak bere taldea
handia al da aldea?
Hartu berriz goldea,
luberritu moldea:
azaletik dugun forma
ez dezagun bihur horma.

Ez gara hain desberdinak:
gorri, beltz edo urdinak.
Bultzatzen gaitu minak,
beti bestek eginak.
Historiaren astuna,
guztion itsutasuna.

Indarrak dakar indarra
eta galerak indarra.
Mendeku deiadarra
bideratu beharra.
Kaltearen ordez ona,
orduan gara persona.

Nola enborra lorrean
idi parea aurrean,
garamatza lurrean
indar batek, hurrean,
geure ekinaren jabe
garela ohartu gabe.

Gizalegean harreman
hitzak jar ditzagun deman,
nahiz ta berotu teman,
eskua gero eman.
Kirolarien gisara
dugun onena atara.

Dolorearen dolore
arantza puntara lore.
Ez ote da ohore,
briluzko ta dotore:
barkatzea barrenean
mina jaso dugunean?

Nekeak dakar jarrera
sarri onetik txarrera.
Egizagun aurrera,
jausi gabe lurrera.
Hauxe da gure denbora:
altza animoa gora!

Iñaki Lasa

Arratiko gizona

Doinua: Bizkaiko aberatsak

Lehenago ebilena
Zeaniko tranbian,
Levi's-ak jantzi eta
noventan Audian
Waka Waka entzunda
Radio Marian.
Arrotza izan zana
Azkunan hurian
Iphonagaz eskuan
dabil gaur Gran Vian.

Miss Sixty, Women' secret,
Stradivarius:
ehun euro gitxiago
nobiaren erruz.
Ariel Excel Gel-a
Nesquik, Aquarius,
dakianak jokatu
dagiala zentzuz
eta eztakiana
dabilela kontuz.

Lehen Benidormeko
beroagaz ito,
orain gurago ditu
Praga ta Egipto.
Goizez Kaiku esnea
ácido oleico,
gauberako koltxoia
viscoelástico,
nahiz ta ehun urtera arte
ez garen biziko.

Venus Williams eta
Valentino Rossi,
Visca Barcelona ta
gora Leo Messi.
WI-FIak NET error-a
emon arren kasi,
Softwareak ezin dau
driver-a ikusi:
guztiok ezin dogu
beti irabazi.

GPSak esanda
Urrekoatxera,
injineru kimiko
gustuko karrera,
Berlingo argazkiak
igon Facebook-era.
Kontua holantxik da
gitxi gorabehera:
pausu bat aurrera ta
hamabost atzera.

Lau txakur txiki boltsan
eta bi MasterCard
Dow Jones indizeak
eginagaitik krak.
Mila amets buruan
errealidade bat.
Aldaketaren batzuk
emon behar ontzat,
baina hori bai botoa
betikoarentzat.

Iñaki Iturriotz