Ionesco eta Mansfielden liburuak berrargitaratu ditue 'Urrezko Biblioteka' bilduma barrian

Bizkaie! 2011-12-23 11:25   Kulturea

Literatura Unibertsala bildumako lehenengo 100 izenburuak daborduko eskuraezinak dirala ikusita, lanok berrargitaratzeko plangintzea adostu eben igaz EIZIEk eta Eusko Jaurlaritzako Kultura Sailak. Hasteko, ehun liburuetatik 20 izenburu aukeratu ditue. Urrezko Bibliotekako lehenengo liburuak Ionescoren Emakume abeslari burusoila eta Katherine Mansfielden Lorategiko festa dira.

Literatura Unibertsala bildumako lehenengo 100 izenburuak daborduko eskuraezinak dirala ikusita, lanok berrargitaratzeko plangintzea adostu eben igaz EIZIEk eta Eusko Jaurlaritzako Kultura Sailak. Hasteko, ehun liburuetatik 20 izenburu aukeratu ditue, eta hurrengo bost urteotan kaleratuko dira. Urrezko Biblioteka izena ipini deutse liburu berrargitaratuek osotuko daben bildumeari. Obra bakotxari jagokozan zuzenketa eta eguneratzeak egingo jakez. Elkar etxeari esleitu jako argitaratzeko lana, lehiaketa publiko bidez.

Eugene Ionescoren Emakume abeslari burusoila eta Katherine Mansfielden Lorategiko festa dira aurkeztu dituen lehenengo lanak. Jon Muñozek itzuli eban Ionescoren lana, 2001ean; eta, Mansfieldena, Anton Garikanok, 1998an. Literatura Unibertsala proiektua 1989an abiatu zan.

Aspaldi euskeratutako obrak diranez, eta bitarte horretan euskereak berak hainbat gauza finkatu dituanez, orrazketa edo zuzenketa beharra daukie. Eguneraketa prozedurea be finkatu da berrargitalpen planaren barruan. Zuzentzaile talde batek obra bakotxari buruzko txostena idatziko dau, itzulpenaren puntu ahulenak, liburuan ikusten dituen joerak eta hobetu daitekezan gauzak azalduz; azterketan hori oinarri, argitaletxeko zuzentzaileak egingo dabe jorratze lana, beti be itzultzailearen oneretxiagaz.

Berrargiratuko diran liburuen zerrendea ondokoa da: Harrotasuna eta aurrejuzkuak, Austen; Finzi-Continitarren lorategia, Bassani; Besteen odola, Beauvoir; Ilunbeen bihotzean, Conrad; Robinson Crusoe, Defoe; Maitalea, Duras; Hotsa eta ardaila, Faulkner; Madame Bovary, Flaubert; Abeslari burusoila, Ionesco; Gure garaiko heroia, Lermontov; Lorategiko festa eta beste kontakizun batzuk, Mansfield; Kontakizunak, Poe; Lisboako setioaren historia, Saramago; Hamlet, Shakespeare; Zeruko belardiak, Steinbeck; Bidaia sentimentala Frantzia eta Italian zehar, Sterne; Gulliverren bidaiak, Swift; Mikel Strogoff, Verne; Farorantz, Woolf; eta, Antologia, zenbait poeta katalan.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu