Meñakako lehenengo Reggae Festibala egingo dabe garagarrilaren 25ean

| Ikusi handiago | Argazki originala

Meñakako I. Reggae Festibala egingo da garagarrilaren 25ean, Nesterika auzoan. Egitaraua 16:00etan hasiko da, AEBetako The New York Ska-Jazz Ensemble taldeak eskainiko dauen musika-tailerragaz. Taldeko Fred Reiter eta Alberto Tarin izango dira irakasleak.

Sound Systemak 18:00etan hasiko dira, Black and Dark Sound System eta Psycho 7ren eskutik, besteak beste. Eta, 20:00etan, Euskal Herriko Chalwa Reggae Bandek eta The New York Ska-Jazz Ensemblek kontzertua egingo dabe. Estatubatuarrek, ganera, Double Edge (Brixton Records) disko barriko abestiak eskainiko ditue. Sarrerea doban da.

Double Edge The New York Ska-Jazz Ensemble taldearen hamaikagarren diskoa da. Rock Steady Freddie Reiter, bandako liderrak esandakoaren arabera, gure jarraitzaileei eskainitako maisulana da. Taldeko kideez gan, hainbat kolaborazino izan ditue: JC Lodge, Weak In Love singlean, Andy Bassford gitarristea, Kim Miller abeslaria, Larry McDonald perkusinoan eta Kevin Batchelor tronpetistea. Produktorea Michael Goldwasse izan da, Easy Star Records etxekoa.

Uribe Kostako Chalwa Band taldea roots reggaearen fanatiko batzuk osotzen dogu, dinoe bandako kideek. Lehenengo pausuak 2006 urtean emon zituen bandeak. Gaur egun hamar taldekide ditu Chalwa Bandek; tekladuak, skanking gitarrea, bateria, gitarra melodikoa, saxoa, tronboia, perkusinoa, eta King Konsul abeslariaren ahotsa. Euskeraz eta ingelesez abesten ditue Jamaikako reggae musika doinuak.