Euskerearen erabilerea bultzatuko da gazteen artean musika eta rol jokoen nahasketeagaz

Getxo, Leioa, Erandio eta Uribe kostako Mankomunidadea osotzen daben herrietan euskerearen erabilerea bultzatuko da gazteen artean musika eta rol jokoen nahasketeagaz Philippa N Barr antropologo australiarrak sortuko dauen bideojokoaren bitartez.

Proiektuan dabilzan instituzinoek Ipar Uribe izeneko markoan batuta emon eutsien hasierea egitasmoari eta mundu mailako ideia lehiaketa baten ondoren aukeratu izan dan egitasmoa aurkeztu dabe bart Imanol Landa Getxoko alkateak, Josu Lazkano Leioako Hezkuntza eta Hizkuntza Politikarako zinegotziak, Saioa Otxoa de Alda, Erandioko Gobernu Batzordeko bozeroaileak, Josu Landaluze Uribe Kostako Mankomunidadeko arduradunak eta Philippa Barr berak.

Landak azpimarratu dau Ipar Uribe proiektua, aitatutako Udal eta mankomunidadearen eta Conexiones Improbables enpresearen hile askotako alkarlanaren fruitua dala. Helburua 16-25 urte arteko gazteen artean euskerearen erabilerea sustatzea da. Landak azaldu dauenez: izatez, euskerea sustatzearen ikuspegitik edade-tarte konplikatua da, personen garapenean sozializazinorako sasoi garrantzitsuak diralako. Getxoko alkateak adierazo dauenez, forma barriak probau behar dira zailtasun guzti horreek gainditzeko; forma barri horreek originalak izan behar dira eta batez be gazteen gaur egungo interesei erantzuna emon behar deutsie, hau da, loturea izan behar dabe adibidez teknologia barriakaz eta musikeagaz.

Ideia lehiaketea

Egitasmoa dinamizetan dabilzan enpresek mundu osoko 27 egitasmo jaso zituen eta lehenengo aukeraketa baten ondoren 7 hautatu ziran (India, Italia eta espainiar estaduko hainbat lekutatik besteak beste) euren artean Philippa Barr antropologoak aurkeztu eta lehiaketako irabazlea izan dana. Philipparen proiektua barritzailea da, bideojoko baten bidez musikea eta parte-hartzaileek garatu beharreko istorio baten kontaketearen nahasketan oinarritzen da. Proiektua oraindino lantzen dagoz eragile sozial desbardinen ekarpenakaz baina aurreikusten da urtarrilerako amaituta egongo dala.

Alice Springs inguruko aborigenakaz lan egin dauen antropologo australiarrak azpimarratu dauenez, urrutiko komunidade horreetako kultura eta hizkuntza gitxiagotuak, Kultura Australiarra bera aberasten dagoz. Philippa Barr-en eretxiz, hizkuntzea jabekuntza tresna garrantzitsua da eta hizkuntzek bizirik irauten daben gizarteek erabilten baditue eta bere herri-kulturan eta musikan erabilten badira, galbiderik ez da izango.

Antropologo australiarrak ondokoa adierazo dau: musikea eta teknologia barriak erabiltea erabagi neban ez indar globalizatzaile moduan bakarrik, baita gazteak hizkuntza gitxiagotuak erabiltera gonbidatzeko be. Aurkeztutako proposamenean kontu klabe bi nahasten dira: rol jokoaren bidez istorio bat kontetea eta musike; bideojokoan, musika talde bateko partaideak izango dira eta komunidade bat sortzea sustatu beharko dabe, euren musikea, letrak eta harrtu-emonak sortuz. Philippa Barr-ek inportantzia handia emoten deutso musikeari hizkuntzen erabilerarako motibazinoan. Philipparen ustez, euskerea hizkuntza oso aberatsa da, oso misteriotsua da eta horrek asko motibau nau.

Kontuak kontu, aitatu lau erakundeek biztanleen arabera ordaindu beharreko 12.000 euroko aurrekontua dauka proiektuak.

Ikusi argazki guztiak handiago