'Erabileraren GPSa' tresnea aurkeztu dabe Soziolinguistika Klusterrak, Urtxintxak eta Topaguneak

| Ikusi handiago | Argazki originala

Soziolinguistika Klusterrak, Urtxintxa Eskolak eta Topagunea euskera alkarteen federazinoak Erabileraren GPSa aurkeztu dabe; bertan, gazteen hizkuntza-erabilerean eragiten dabe faktoreen azterketa egin dabe. Gazteek eurek, gazteekaz lanean ibilitakoek eta gazterian adituek hartu dabe parte lanean. Gairen inguruko ikuspegi orokorra eskaintzea da azterketearen helburu nagusia.

Urteak daroez Soziolinguistika Klusterrak, Urtxintxa Eskolak eta Topaguneak alkarlanean gazteen hizkuntza-erabilerearen gaia jorratzen. Hainbat aditu eta gaztegaz Gazteen hizkuntza erabileran eragiten duten faktoreen azterketa egin eben, eta orain Erabileraren GPSa aurkeztu dabe.

Ikerketearen emoitzea fenomeno osoaren ikuspegia emoten dauen mapea da. Mapan erabileran eragiten daben 11 faktore bereizi ziran, bakotxa bere azpifaktoreekaz, eta hiru mailatan antolatuta.

Gazteen parte-hartze zuzena euki dau, eta hainbat arlotako adituek euren eretxiak emon ditue, besteak beste, unibersidadekoak, hezkuntza mundukoak, administrazino publikokoak, komunikazino arlokoak, aisialdi antolatukoak, hedabideetakoak eta euskerearen aldeko mobimentukoak.

Lan teoriko eta deskriptiboek, gizartera bideratzen ez badira balio barik geratzeko arriskua dabe, azaldu dabe lanaren arduradunek. Horregaitik, egindako azterketatik tresna bat sortu dabe. Erabileraren GPSa hizkuntza-erabileran kokatzeko eta esku hartzeko gidea da, gazteei eta eurekaz jarduten dabenei zuzendutakoa. Hizkuntzearen erabileran eragiten daben aldagai guztiak kontuan hartuz lan egiten laguntzeko sortu da, egiten dogunaz ondo hausnartu eta lanari gura dogun norabidea emoteko.

Fenomenoa ulertzeko eta azaltzeko, egoera zehatz baten diagnosirako, gazteen erabileran esku hartzeak planifiketako edo aurrera eroandako ekimenak ebaluetako balio dau tresna barriak.

Liburuxkearen edizino digitala eskuragarri dago www.soziolinguistika.org/gazteak helbidean. Papelezko liburuxkea eta posterra jaso nahi izan ezkero, eskaerak kluster@soziolinguistika.org helbide elektronikora bideratu behar dira.