Etxepare Institutuak eta Ramon Lull Institutuak alkarlanerako hitzarmena sinatu dabe

| Ikusi handiago | Argazki originala

Etxepare Euskal Institutuak eta Ramon Llull Institutuak lankidetza hitzarmen markoa sinatu dabe Donostian. Itunaren helburu nagusia euskerearen eta katalanaren zabalkuntza ardatz daben programa eta ekintzetan alkarlanean jardutea da. Aizpea Goenaga Etxepare Euskal Institutuko zuzendariak eta Vicenç Villatoro Ramon Llull Institutuko zuzendariak sinatu dabe.

Ramon Llull Institutua katalan hizkuntza eta kultura zabaltzeko asmoagaz sortu zan 2002 urtean, Kataluniako eta Balear Irletako gobernuem ekimenez. Igaz, urrian, hasi zan institutuen arteko hartu-emona.

Goenagak Ramon Llull Institutuak azken urteotan egindako lana goraipatu dau prentsaurrekoan, eta Etxepare Euskal Institutuarentzat erreferente garrantzitsua dala nabarmendu dau. Etxepare Euskal Institutuak sareen indarra erabili eta beste kulturekaz hartu-emonak bultzatu behar dituala adierazo dau.

Vicenç Villatorok erakunde bien arteko sintonia ona azpimarratu dau, eta hartu.emona esperientzien trukea baino gehiago dala nabarmendu dau. Alkarlanak katalan eta euskal kultureari ate gehiago zabaltzea espero dabe. Hitzarmena lau urterako da.

Aztertzen dabilzan proiektuen artean, euskerea eta katalanaren ganeko espezializazinoak edo 'minor' izenekoak sortzea dago, besteak beste. Hispanismo klasikoaren ideia albo batera itxi, eta iberiar penintsulako identidadeak, hizkuntzak eta kulturak erakusteko, gero eta gehiago unibersidade gehiagotan emoten da katalan, euskera edo galego eskolak.