Ipar UriBBK Sariketea

| Ikusi handiago | Argazki originala

Aurreko asteko artikuluan -dokumentu erantsi legez kamuflautakoan- esan neutsuen moduan, atzo, arrastiko zazpiretan hasita jokatu zan BBK Sariketearen finala Bilboko Kafe Antzokian. Bertako oholtzatik eta Bernar Mandalunizen esanetara igazko talde finalistek kantau eben: Ipar Uribek eta Lea-Artibaik.

Ipar Uribetik: Maialen Markaida, Inaxio Vidal, Imanol Uria -18 urtera artekoetan-; Peru Vidal, Beñat Vidal eta Arrate Illaro -25 urtera artekoetan-.

Lea-Artibaitik: Josune Aramendi, Aissa Intxausti, Elene Lejarzegi —18 urtera artekoetan-; Nerea Ibarzabal, Eneko Arrate eta Xabat Galletebeitia —25 urtera artekoetan-.

Finala Kafe Antzokiko bigarren pisutik ikusi eben pribilegiatuak, barriz: Joserra Bilbao, Larraitz Trojaola, Arkaitz Estiballes, Juanjo Respaldiza eta Gorka Intxaurbe izan ziran. Azken horren eretxian BBK Sariketea ederra da epaitzeko orduan. Izan be, gauza barri asko entzuten dira bertsolariengandik eta saio ailegobakoak eta, gehienetan, bizkorrak izaten diranez, taketa lez entzun leitekez. Bertso-terapia onak dira BBK Sariketea eta Eskolarteko Txapelketak.

Igarriko zenduenez, grabagailu eta guzti joan nintzan Kafe Antzokira eta aurreko elkarrizketea eta hiru-lau bertso be ekarri deutsuedaz, gero eta bertsolari hobeak izango diranenak. Bertara inguratu ez zinienok kexau ez zarie egingo, demonientrook…

18 urtera artekoakaz hasteko, BBK Sariketan hasibarria dan Aissa Intxaustiren bertsoa dakartzuet. Lau oinak emon eta bertsoa ederto osotu eban lekeitiarrak:

Diote ni naizela
neskatxa argia.
Eta nahiz ta batzutan
galtzen den haria,
gaur irabazi ezkero
diotsut egia:
hontan irabazikot
eguneko ogia.

Imanol Uriak goitik behera erantzun eban Bernarrek ipinitako puntua:

Euskalakari asko
jabilkuz korrika
ta ezin gara egon
sofan jesarrita.
Igandean Donostin
badaukagu zita,
herria euskalduntzeko
gugandik hasita.

25 urtera artekoetan, Peru Vidal eta Nerea Ibarzabalen zortziko handiko ofizioaren lehen lau bertsoak dozuez hurrengoak. Aitagarria da Nereak bere ironia finagaz zelan irudikatu eban baserri ingurua.

Gaia: Bikote gaztea zarie, Peru eta Nerea. Lasaitasun bila baserri batera joan zarie biziten. Ordutik, Nereak ez dau lorik egiten zarata txikerrenak be ikaratu egiten dau-eta.

Peru Vidal:

Hirian ginen bikotea bai,
baina gu harrapatuta
ta baserrira etorri ginen
zarata denak ahaztuta.
Gaur nire albora negarrez zatoz
zu erabat beldurtuta.
Ba alboratu zaitez gehiago
nik babestuko zaitut-ta.

Nerea:

Baserri baten bizitze honek
emon dizkit ezusteak.
Itxura danez beldurtu eiten nau
ni honelako pakeak:
behiak marrusa bat egin eta
gero txakurren kateak.
Holako gauzak eukitxen ditxuz
kalekume izateak.

Peru:

Kalekumeak ginen lehenago:
ze aldaketa itzela!
Behiak, txakurrak eta ardiak
oroitu gugan gaudela.
Eta beldurtzen bazara, neska,
itxi begiak horrela
eta pentsatu hemen mendian
biak askeak garela.

Nerea:

Goizean zehar ibiltzen gara
biok katiuskak jantzita.
Ta goizaldean entzun dezaket
oilo danen ika-mika,
ta gaberdian eginez gero
otsoren batek bisita,
beldurrik ez dot zulako hartz bat
nere alboan edukita.

Xabat Galletebeitiak be alozoko bertsoa bota eban bakarreko beharrean. Gaia: gaur jakin dozu orain 30 urte hildakotzat emon zenduan umea bizirik dagoala.

Ta nik ez badut bera aurkitzen
baietz berak ni bilatu,
baina ez nuke nahi nire barruan
min gehiagorik pilatu.
Berriro bere ama izan nahi dut,
bere etxeko teilatu.
Eta nork ostu zidan berdin zait
ez dut nahi neurririk hartu.
Ta bere bila noa kalera
beste dana nahi dut ahaztu.
Soilik bi gauza egin nahi ditut:
ezagutu ta gozatu.

Azkenean, puntuazinoa holantxe geratu zan:

- Ipar Uribe 171 + 239 = 410 puntu.
- Lea-Artibai 150’5 + 239’5= 390 puntu.

Bizkaiera egokienaren saria Illart Gumuzio arratiarrarentzat izan zan eta finalistarik gazteenarena, barriz, Aissa Intxaustirentzat.

Akabetako, berba bi baino ez: batetik, ea atzo iluntzean ikusi nituan gaztetxu eta gazteek gero eta oportunidade gehiago daukien geure herriko plazetan. Oraindino konfiantza gehiago hartuko leukie eurek eta, holan, geuk be bertso eleganteak entzuten segiduko geunke. Bestetik, zorionak Manex Agirre eta Julio Sotori Arabako eta Nafarroako txapelengaitik. Zelan nabilen bertsoa.com-en txapelketok apurka-apurka bideoan ikusten -bertso guztiak ez dodaz oraindino errepasau-, esan behar dot Xabier Silveiraren batzuk sano gustura entzun dodazala. Genialidade-puntu askoko finala egin eban, nire eretxian.

Hurrengora arte,