Gastrotabernak negozio eredu barri edota algen erabilerea dira Basque Culinary Center-ek lauhileko honetarako dituan ikastaroetako batzuk

| Ikusi handiago | Argazki originala

Etenbako prestakuntzako lehen edizinoak izan eban arrakastea ikusirik, 400 profesional pasau baitira, Basque Culinary Center-ek martxan jarri dau orain programa bat lauhileko honetarako hogei bat ikastaro emoteko gastronomiaren sei arlo nagusitan. Basque Culinary Center-eko zuzendari eta Mondragon Unibertsitateko erretoreorde Joxe Mari Aizegak aurkeztu dauen eskaintzea malgua da, bizia, desbardina eta sektorearen beharrei egokitua, eta barritasun batzuk dakarz, adibidez algek sukaldean daben erabilerea, pintxoak prepareteari buruzko ikastaroak, eta gastrotabernak negozio eredu barri, besteak beste. Ikastaro trinkoak dira, talde murritzei zuzendutakoak -15 lagun- eta eduki, metodo eta ordutegietan partaideei egokituak.

Prestakuntza eskaintza honek, sei multzo handitan banatuta baitago -produktua, sukaldeko teknikak, aretoa, sommelier lana, jatetxeek kudeaketa, eta elikadura-industria-, jatetxearen jarduera arlo guztiak hartzen ditu eta baita industriako sukaldaritza prestakuntzako prozesuak be, eta erantzun egin nahi deutse sektorean profil profesional kualifikatuagoak eta gaitasun handiagokoak preparetako beharrari. Ikastaroak emongo dituen profesionalen artean, besteak beste, Mikel Zeberio, Iñigo Lavado, Patxi Bergara, Aitor Arregi, Albert Adriá eta Quique Dacosta dagoz.

Ikastaroak

Produktuari buruz hiru ikastaro emongo dira, okelea eta aprobetxamendu barriak; esnekiak eta sukaldeko teknikak, prestaketak eta aplikazinoak; eta algek sukaldean daben erabilerea. Sukaldeko Teknikak zazpi ikastarotan emongo dira, horreetatik bi pintxoak produzidu eta prepareteari buruz, eta hori osotzeko, hutsean egindako egostea, parrillaren mundua, ehundura barriak sortzea… Aretoko gaian emongo diran ikastaroak, barriz, honeek: jatetxean zerbitzu zikloa optimizetea, ekitaldi eta banketeetan zerbitzua antolatzea, eta jantokia dekoratu eta girotzea. Sommelier-en taldeak bi izen nagusi ditu: Quim Vila-k, Ardaoak eta lurrin-usainak gaia landuko dau eta Pepe Hidalgo enologoak Enologoa eta bere ardaoak gaia jorratuko dau. Jatetxeetako Kudeaketeak sukaldearen diseinua eta kudeaketea, eta, gastrotaberna negozio eredu barri legez landuko ditu. Azken multzoan Industria-elikadurea landuko da, ikastaro bat emongo da elikagaietan balio-bizitza zein dan jakiteko. Izan be, hau da barritasunik nagusienetako bat bigarren edizino honetan, produktuei, horreen ezaugarriei, egiari eta prestakuntza erei buruzko ikastaroak.

Ikastaroren batean izena emoteko interesa dabenek www.bculinary.com webgunean egin leikie edo 943535103 telefonora deituz.

Masterra

Prestakuntza eskaintzea osotzeko Jatetxeen Barrikuntza eta Kudeaketa Masterraren bigarren edizinoa egingo da, urrian hasita, 15 toki izango dira Basque Culinary Center-en egoitza estreinau barrian, Gastronomia eta Sukaldaritza Zientzien Gradua irailean hasiko baita. Masterraren helburua da jatetxe baten alde desbardinak kudeatzeko gaitasunak lantzea (sukaldea, zerbitzua eta enpresaren kudeaketea) eta baita jatetxe bat zer dan eta zelan kudeatzen dan modu barritzaile zabalean ikastea.

Mondragon Unibertsitateko Gastronomia eta Sukaldaritza Zientzien Graduak hutsune hori beteko dau Europako Goi Mailako Hezkuntzeari egokitutako titulazinoen bidez, lau jakintza arlo nagusi izango ditu: Sukalde-areto-sommelier teknikak, negozioaren kudeaketea, Zientzia eta Teknologia eta Kultura eta Artea. Fakultatearen jarduerea hiru prestakuntza alor nagusien ingurukoa izango da. Gastronomia eta sukaldaritza zientzien graduak unibersidadeko titulu ofiziala izango dau, lau urteko iraupena eta ondoko jakintza-arloak: sukaldea-aretoa, negozioaren kudeaketea, zientzia eta teknologia eta kultura eta artea, gazteleraz eta ingelesez emongo da. Graduondoko ikastaroetan bereizi egingo dira sukaldeko profesionalak, batetik, eta gastronomian eta etenbako prestakuntza arloan espezializau nahi daben beste arlo batzuetako profesionalak, bestetik.

Bien bitartean, I+G+b gunearen helburua da ikerketea eta jakintzearen eskualdatzea sustatzea goi mailako sukaldarietan eta gastronomiagaz zuzenean edo zeharka lotutako enpresa eta jakintza sektoreetan, euren arteko sinergia be sor daiten.