Harridurea eta kezka adierazo dabe hiru foru aldundietako kulturako diputaduek Patxi Lopezek euskerearei buruz esanikoen aurrean

EAEko hiru foru aldundietako kulturako diputaduak (Arabako Malentxo Arruabarrena, Bizkaiko Josune Ariztondo eta Gipuzkoako Maria Jose Aranburu) alkarregaz prentsaurrean agertu eta euren harridura eta kezka adierazo dabe Patxi Lopez lehendakariak Euskerearen Aholku Batzordean esandakoak entzun ostean. Lehendakariak esan -eta irakurri- eban indarkeriaren amaiereak euskerea libreago egingo dauela eta mesede egingo deutsola euskalgintzeari.

Araba, Bizkaia eta Gipuzkoako lurralde historikoetako kultura arduradunek adierazpen horreek zuzendu daizala eskatu deutsie, eta euskerearen aldeko jarrera eta politika positiboak balioetsi daizala. Horrezaz gan, ondokoa adierazo dabe: Herri Agintarien eginkizuna da, aukera bardintasuna helburu, gure bi hizkuntza ofizialen artean egoera ahulenean dagoanaren erabilerea -euskerearena- beren-beregi zaintzea.

Kontuak kontu, ondoko agiria plazaratu dabe:

Abenduaren 24an Euskararen Aholku Batzordea batu zan. Bertaratutako gehienak, hainbeste hilebete eta gero, euskerearen alde lan egiteko asmoz eta alkarlanerako borondatez joan ziran, euskal gizartearen gehiengo handi batek halaxe eskatzen deuskulako euskerearen alde konpromiso publikoak hartzen doguzanoi. Jarrera horregaz joan ginan Arabako, Bizkaiko eta Gipuzkoako Aldunditik be.

Baina Patxi Lopez lehendakaria entzun ondoren esaten —eta irakurten- indarkeriaren amaiereak euskerea libreago egingo dauela eta mesede egingo deutsola euskalgintzeari, harrituta eta arduratuta gagozala autortu behar dogu.

Harridurea eta kezka, ez dogulako ulertzen zelan erakutsi leiken lehendakari batek euskereagazkoo begirune falta hain nabarmena.

• Ez al daki euskerea dala euskaldun guztion hizkuntza eta gainera ofiziala?

• Ez al da konturatzen, euskerea dala gure gizarte kohesinorako tresna nagusietakoa?

• Ez al daki, euskerea politizazino arriskuarengandik aldendu barik berak egin dauela euskerearen politizazinorik larriena?.

• Ez al dau gogoratzen EABko kide batek Euskal Herritik urten behar izan ebala ETAren mehatxutik igesi eta beste bat ETAk hil egin ebala?

Patxi López-ek berba horreekaz hainbat herritar eta giza-talde iraindu egin ditu:

• Euskalgintzearen alde sendo lan egiten dabilzan persona eta gizarte taldeak.

• Euskerea ikasten ahalegin bikaina egin dabenak.

• Euren seme-alabek euskerea ikasteko apustua egin dabenak.

• Diktadura garaian euskerearen biziraupenaren alde egiteagaitik zigorrak eta mehatxuak jaso zituenak.

• Euren eguneroko bizitza bakezkoan, ohiko hizkuntza euskerea dabenak.

• Euskereak, beste hizkuntza guztiek legez, gizakiaren kulturea aberasten dauela pentsatzen dabenak.

• Indarkeria errotik sufridu eta mila aldiz euskeraz salatu daben guztiak.

• Eta beste hainbat eta hainbat herritar.

Lehendakariari eskatzen deutsagu zuzendu daizala adierazpen oker horreek eta, batez be, euskerearen aldeko jarrera eta politika positiboak balioetsi daizala:

• Euskerea erakargarriagoa eginez.

• Euskeraz berba egiten dabenei babesa emonez.

• Eta elebakarrak diranei euskerearen mundu zoragarria erakusteko bideak edegiz.

Hiztun guztien aukerak errespetau behar dira. Baina aukera-bardintasuna helburu daben Herri Agintarien eginkizuna da, gure bi hizkuntza ofizialen artean egoera ahulenean dagoanaren erabilerea —euskerearena- beren-beregi zaintzea. Betebeharrik nagusiena, beraz, euskeraz berba egiteko aukerak sustatzea eta, arian-arian, bermatzea. Horixe da normalizazinoaren bidean pausuak emotea.

Ikusi argazki guztiak handiago