Eusko Jaurlaritzeak euskerearen erabilerea sustatuko dau 20 udalerritan 'Kontalaria' programa barriaren bidez

| Ikusi handiago | Argazki originala

Eusko Jaurlaritzeak euskerearen erabilerea sustatuko dau eremu publikoan 'Kontalaria' egitasmo barriaren bitartez. Programeak 20 bat udalerri bisitauko ditu urriaren 2an hasita, eta bere beste helburuetako bat ipuin kolektibo bat sortzea izango da.

Blanca Urgell Eusko Jaurlaritzako Kultura sailburuak prentsaurrekoan azaldu dauenez, 'Kontalaria' proiektuaren bitartez, besteak beste, eguneroko espazio publikoetan euskerearen erabilerea bultzatu nahi da: Proiektu honegaz gainera, euskerearen erabilereari balioa emon gura jako. Beti be, hizkuntzeagaz bat eginda sormena eta teknologia barriak landuz. Inposizinoetatik kanpo, limurtzea da jarraitu beharreko bidea hizkuntza bat irakatsi edo ikasterako orduan. Behin eta barriro esan dogu, Jaurlaritza honen hizkuntza-politika limurtzean, berbearen balioan eta hizkuntza ikasteko poztasunean oinarritu behar da'.

Egitasmoa tarteko dala, ipuinak kontetako espazioa izango dan kamioi batek Bilbo, Irun, Donostia, Deba, Tolosa, Beasain, Eibar, Durango, Arrasate, Oñati, Gasteiz, Laudio, Galdakao, Barakaldo, Getxo, Bermeo, Mungia, Gernika eta Lekeitioko plazak bisitauko ditu. Kamioi hori ipuina kontetako espazio ludikoa izango da. Barruan, kontu kontari jarduteko pantaila eta bideo kamera izango ditu, eta espazio horretan gauzatuko da ipuin kolektiboa. Kanpoko animazinoaren bitartez, parte-hartzea bultzatuko da eta errejidoreak funtzionamenduaren mekanikea argituko dau. Aurreko parte-hartzaileak kontau dauen istorioa erakutsiko jako partaideari aurrekoaren kontakizunagaz jarraitu daian. Azkenik, ikus-entzunezko teknikariak, aurrez markatutako erispideak erabiliz, ipuina gauzatuko dau. Haur nahiz gazte, heldu nahiz edadeko, guztiek parte hartu leikie.

Gainera, kontakizun guztiak www.kontalaria.com webgunean ikusi ahal izango dira, eta batzuk EiTB taldeko kanaletan be emongo dira. Era berean, aitatu 20 udalerrietan ibilbidea amaitzen danean, abenduaren 3an, kontakizunak editau, argitaratu eta ipuin kolektiboko formea emongo jake.

Bestalde, Bego Muruaga Eusko Jaurlaritzako Euskara Sustatzeko zuzendariak azaldu dau 'Kontalaria' proiektuak oinarrizko bi estrategiari erantzuna emon nahi deutsela, hain zuzen be, 'alde batetik, herritarrei adierazpen tresna bat emotea lengoaia ludikoa eta normalizatua bultzatuz, eta bestetik, euskerea eguneroko espazio publikoetara hurreratzea ekintza zuzenen bidez'.

Azkenik, Fran Lasuenek hitza hartu eta adierazo dau ilusinoz eta indarrez ekingo deutsiela egitasmoari eta espero dauela herritarrek be gogoz erantzutea. 'Euskerea bultzatzeaz gan, argi dago gozetako eta ondo pasetako proiektua dala 'Kontalaria', beraz herritar guztiak animau nahi ditut bertan parte hartzera'.