Gasteizko Udalak euskerearen erabilerea sustatzeko kanpainea abiarazo dau

| Ikusi handiago | Argazki originala

Gasteizko Udalak 'Euskaraz maite zaitut. Maitasun kontua' izeneko kanpainea aurkeztu dau gasteiztarren artean euskerearen erabilerea sustatzeko helburuagaz.

Maite Berrocal Gasteizko Udaleko Euskera, Kultura eta Kirol zinegotziak, Patxi Martinez de Marigorta Eusko Jaurlaritzako Administrazino Publikoetako Hizkuntz Normalizazinorako zuzendariak eta Agustin Otsoa Eribeko Arabako Foru Aldundiko Euskera, Kultura eta Kirol zuzendariak aurkeztu dabe kanpainea prentsaurrekoan.

Berrocalek adierazo dau euskereak balio erantsia emoten dauela, eta horregaitik, euskerea erabilteak aukera eta garapenerako esparru gehiago eskaintzen dituala, bai eremu familiarrean zein lanean edo aisialdian.

Era berean, zinegotzi gasteiztarrak azaldu dau kanpaina barriak gurasoentzako euskera ikastaroak eskainiko dituala uri-zentroetan, bai eta etorkinentzako be. Gainera, euskaltegian ikasi nahi dabenek bekak eta diru-laguntzinoak eskuratu ahal izango ditue.

Berrocalek gaineratu dau egitasmoa gehienbat kirol eta aisialdiko monitoreei eta merkataritzako langileei dagoala zuzenduta, eta merkatarien prestakuntzan Gasteizko Udalak Arabako Merkataritza eta Industria Ganberaren laguntzinoa dauela zehaztu dau.

Bestalde, orain urte batzuk euskerea ikasi baina hizkuntzea erabili barik denporea daroenak gogoratu ditu zinegotziak, eta Gasteizko Udalak martxan jarritako 'Mintzalaguna' eta 'Gurasolaguna' egitasmoak ekarri ditu gogora.

Horrezaz gan, 'Euskaraz maite zaitut. Maitasun kontua' egitasmoak publizidade kanpaina bat izango dauela adierazo dau. Horretarako 9.000 triptiko banatuko dira uri-zentroetan eta 9.000 diptiko euskaltegietan.

Araban euskerea sustatzeari jagokonez, Berrocalek iragarri dau publizidade kanpaina paralelo bat jarriko dabela martxan arabarrei zuzenduta, 'Atara plazara' goiburupean, euskerearen erabilerea sustatuko dauena espazio publikoetan.