Alkarteetan euskerearen erabilerea sustatzeko metodologia eskuliburua aurkeztu dau Topaguneak

| Ikusi handiago | Argazki originala

'Elkarteetan eragiten hitzarmengintzaren bidez. Entitateak euskalduntzeko metodologiaren garapena' eskuliburua aurkeztu dau Topaguneak gaur, bagilaren 22an Bilbon, Bizkaiko Foru Liburutegiko ekitaldi aretoan. Eskuliburu honek, era guztietako alkarteetan euskerearen erabilerea sustatzeko metodologia garatzen dau. Euskera alkarteek 20 urtetan gizarteko eremu sozioekonomiko desbardinetan landutako hitzarmengintza egitasmoen metodologia dau oinarrian gaur aurkeztutako proposamenak eta Iñaki Eizmendik, Ebete zerbitzuetako arduradunak, herrietan dabilzan era guztietako alkarteetara egokitzeko lana egin dau, Topaguneko Entidadeak Euskalduntzeko Saileko Piedad Dorado (Durangoko Berbaro euskara alkartea), Ainara Labado (Eibarko ....Eta Kitto! euskara alkartea), Itziar Larzabal (Irun Iruten euskara alkartea), Galder Unzalu eta Sonia Perez-egaz batera.

Gaurko aurkezpenean Topaguneko ordezkari Jasone Mendizabal eta Galder Unzalugaz batera, Ebete-ko Iñaki Eizmendik parte hartu dau. Metodologiaren garapen eta argitalpenean Topaguneak lagun izan ditu era berean Bizkaiko Foru Aldundia zein Eusko Jaurlaritzea, babesle modura.

Iñaki Eizmendik metodologia bera aurkeztu dau. Eskuliburua tresna modura jaio dala azpimarratu eta helburu zehatza dauela gogoratu dau: alkarteetan eragiteko tresna zehatz, erabilgarri eta praktikoa eskaintzea, alkarteotako bizitza soziala (barruko eta kanpoko funtzionamendua) euskaldundu daiten.

Metodologia apliketako hiru plan pilotoen emoitzak be aurkeztu dira. Ermua, Deustu eta Ordizian izan dira proiektuok martxan 2009 eta 2010 urtean zehar eta landu diran arloetan (aisialdi, kirol eta kultur alkarteakaz landu da gehienbat orain arte) emoitza interesgarriak lortu ditu. Ermuako Euskal Birusa, Deustuko Berbaizu eta Ordiziako Hitzaro euskara alkarteak izan dira herri horreetan egitasmoak gidatu dituenak. Azken hilebeteetan beste herri batzuetara zabaltzen hasi da metodologia.

Liburua salgai dago Topagunean eta hurrengo asteotan ahalik eta zabalkunde handiena emongo jako metodologia garatzeko interesa daben erakundeen artean.