15.556 ikaslek landu dabe bertsolaritzea ikastetxeetan Bertsozaleren eskutik

| Ikusi handiago | Argazki originala

Bertsozale Elkarteak bertsolaritzea lantzeko ikasturte osoko proiektua eskaintzen dau ikastetxeetan. Euskera ikasgaiaren barruan, astero lantzen dabe bertsolaritzea, irakasle espezialista batek gidatuta. Ikasle liburuaz gan, ikus-entzunezko materialak erabilten ditue gelan.

Proiektuan 300 ikastetxek eta 15.556 ikaslek parte hartu dabe amaitzear dagoan ikasturte honetan. Araban, Bizkaian, Gipuzkoan eta Nafarroan zabaldutako proiektua da (Nafarroari jagokonez, Hezkuntza Sailaren hitzarmenak babestuta).

Bertsolaritzearen Curriculuma (Bertsozale Elkartea, 2008) da ikastetxeetako proiektuaren oinarri pedagogikoa. Ikastetxetako lanketearen helburuak honeek dira: hizkuntza-komunikazinorako konpetentziak garatzea, umeak bertsozaletu eta euskereagazko jarrera positiboa izatea, bertsolaritzea dan kultur adierazpidearen oinarrizko ezagutza izatea eta jentaurrekotasuna lantzea.

Proiektuan urterik urte gero eta ikastetxe gehiagok parte hartzen dabe; ikastetxeen eskutik jasotako balorazinoetan proiektuaz nabarmentzen dituen ezaugarriak honakoak dira: metodologiaren dinamikotasuna (ikasgelako ohiko errutina apurtzen baitau), hizkuntzea lantzeko emoten dituan aukerak, bertsolaritza irakasleek umeakaz lortzen daben hurrekotasuna, ikastetxeko ekitaldietan parte hartzen daben prestutasuna, eta ikasleek bertsolaritza klasea gustuko izatea.

Ikasturtean zehar egindako lanaren erakusgarri, umeek preparautako emonalditxuakaz bertso jaialdiak eskaintzen dagoz ikastetxe eta herrietan, maiatzean eta bagilean.

Gipuzkoan Ikastetxeak Bertsotan' izeneko 70 jaialditan 8.030 umek igongo dabe oholtzara

45 herritako areto, kiroldegi eta ikastetxetan egingo dira 70 jaialdiak, herritarrei eta gurasoei zabalik. Danetara, 113 ikastetxek eta 8.030 ikaslek parte hartuko dabe ikuskizunotan. Ikasleek eskainitako bertso emonaldiez gan, tokiko bertso-eskolak eta bertsolariak be izango dira taula ganean.

Iparraldean Bertsulari Ttiki Egunak 20 ikastetxe eta 500 ume alkartuko ditu

Bagilaren 3an ospatuko da Bertsulari Ttiki Eguna, Hazparnen. Goizean Eskolarteko Txapelketako finala (umeen mailakoa) eta Bertsopaper Lehiaketearen sari banaketea eta bazkalostean bertso jolasak izango dira.

Bizkaian 4.900 ikasleren eskutik 35 Kantaldi eta ikastetxeen arteko 6 topaketa egingo dira

Kantaldietan, Aitor Rubio musikariaren laguntzinoagaz, euskal kantutegiari errepasoa emoteaz gainera, ikasleek jarritako bertsoak oholtzara eroango ditue. Topaketatan ikastetxe bakotxak preparautako emonaldien tartean musikariek eta bertsolariek be parte hartzen dabe.

Araban 750 ikasle eskualdeka alkartuko dira Topaketetan

Lau Topaketa egingo dira, herriko aretoetan eskualdeko ikastetxeak alkartuz. Ikastalde bakotxak agertokira eroango dau bere ekitalditxua. Danetara, 20 ikastetxek eta 750 ikaslek parte hartuko dabe.

Nafarroan 1.414 ikaslek parte hartu dabe Bertsopaper Lehiaketan eta 5 saio egin dira

Nafarroako Gobernuko Hezkuntza Sailagaz batera antolatutako Bertsopaper Lehiaketan, 61 ikastetxetako 1.414 ikasleren lanak jaso dira. Saribanaketei loturik, 5 eskualdetan saioak egin dira eta ikasleek bat-batean jarduteko aukerea izan dabe. Oskar Estangak musikaz girotu ditu emonaldiok.