Eskualdeko euskerearen berezitasunak eta bizimodu tradizionalak batzen dituan eskola materiala aurkeztu dabe Getxon

Uribe Kostako azpieuskalkiaren aberastasun guztia jaso eta zabaltzea eta euskaldun zaharren hizkuntza ondarea (lexikoa, fonetikoa…) eta ondare etnografikoa (bizimodu tradizionalak, kantak, bertsoak, ipuinak…) zabaltzea helburu dituan proiektuaren eskola materiala aurkeztu dabe gaur prentsaurrekoan Imanol Landak, Getxoko Alkateak eta Akaitze Kamiruaga, Labayru Ikastegiko herri ondarea taldeko arduradunak. Materiala Getxoko Udalaren eta Uribe Kostako Mankomunidadearen euskerearen transmisinoa ziurtatzeko proiektuaren fruitua da. Horretarako, 2005ean eta 2009an lankidetzako hitzarmenak sinatu zituen Getxoko Udalak eta Uribe Kostako Mankomunidadeak eta 2005ean, Labayru Ikastegiari esleitu eutsien ekimena aurrera eroatea.

Eskualdeko 120 euskaldun zaharri alkarrizketak egin deutsiez euren erantzunen bidez hizkuntzearen ezaugarriak eta bizimoduen ezaugarriak batu eta ondoren eskola materiala egin ahal izateko. Erantzun horreei esker, lanbideen, jaiak ospatzeko moduen, familia giroaren kontakizunen eta abarren bidez berba egiteko erabilitako hitzak eta esamoldeak batu ditue kanta, ipuin eta bertsoakaz batera.

Proiektua Getxoko Udalak orain urte batzuk gure ondare etnografiko eta linguistikoa jaso eta zabaltzeko martxan jarritako bidean beste pausu bat da eta orain aste batzuk martxan jarritako Ondare Udabarria zikloko beste jarduera bat. Gainera 'inguruko udalerriakaz alkarregaz lan egiteko borondatea erakusten dau (aurten be ondareari buruzko bi monografía egiteko beste lankidetza hitzarmen bat sinatu dogu Uribe Kostako Mankomunidadeagaz, Erandio eta Leioako udalakaz) eta hemendik aurrera be lanean jarraituko dogu gure altxorra dan euskerea berreskuratzeko eta zabaltzeko helburuagaz, hori baita gure konpromisoa' adierazo dau Imanol Landak.

Ekimenaren kostua 105.000 €koa izan da eta horretatik Udalak % 51 ipini dau eta Uribe Kostako Mankomunidadeak ganerakoa. Proiektuak Bizkaiko Foru Aldundia eta Eusko Jaurlaritzearen laguntzinoak be izan ditu.

Lau liburu eta DVD bat

Aitatutako informazino horregaz guztiagaz lau liburuen bildumea (800, danetara 3.200 liburu) eta DVD bat (20.000 ale) kaleratu dira, eskola curriculumean txertatuta eta Haur eta Lehen Hezkuntzetako, 0 eta 12 urte bitarteko, umeei zuzenduta. Umeek hainbat gai, tartean etxea, familia, osasuna, produkzinoa eta lanbideak bertoko berezitasunak kontuan hartuta eta bertoko letrakaz landuko ditue geletan. Bizi diran lekuari buruzko informazino ugari agiri da, auzoen eta etxeen izenak, bertako ohiturak, ondoko basoetako landareak, animaliak, sinismenak, esaerak, hitzak…

Materialaren ezaugarrien artean, bi euskarritan banatuko da, liburuak eta DVDa; ez ditue testu liburuak ordezkatuko; unitate didaktikotan banatuta dagoz; oso erakargarria da umeentzat eta ahozkotasunari emoten deutso garrantzia. Akaitze Kamiruagak adierazo dauenez, 'orain arte era naturalean jazoten zan belaunaldien arteko transmisinoa kasu askotan galdu danez, materialak euren arteko zubia izan nahi dau euskerea eta bizimodu tradizionalak gal ez daitezan. Aitite-amamarik ez daukien umeek eskola materialagaz eukiko ditue'.

Fadurako ekitaldia

Udalak eta Uribe Kostako Mankomunidadeak esker ona adierazo nahi deutsee alkarrizketatutako 120 euskalduni eta gure artean dagoeneko ez dagozanen familiei be, eta horretarako datorren zapatuan, maiatzaren 8an, goizeko 10:00etatik aurrera ekitaldi bat antolatu dabe Fadurako Kiroldegian. Han DVDaren kopia bana opatuko deutsee eta baita gure udalerrian bizi dan Luis Artola artisauak egindako egurrezko oroigarria be. 'Eskerrak emon nahi deutseguz eskainitako laguntzinoagaitik eta, era berean, goraipatu nahi dogu eurei esker gure hizkuntzearen transmisinoa zabaltzen eta zabalduko dala. Egungo belaunaldientzat hizkuntzearen transmisinoaren garrantzia autortuko dogu, horretan gure nagusiek jokatzen daben paper nabarmena goraipatuz eta eskertuz' nabarmendu dau Getxoko Alkateak.

Ikusi argazki guztiak handiago