'Euskerea, eskaintzarik onena', merkataritzan eta ostalaritzan euskerearen erabilerea sustatzeko baliabideak martxan

Bizkaiko 16 udalek eta 2 mankomunidadek sustatu dabe egitasmoa eta helburu nagusia da merkataritzan euskerearen erabilerea sustatzea merkataritzako edozein arlotan. Esangura horretan, kanpainearen hartzaile nagusiak esparru guztietako merkatariak eta ostalariak dira. CDa euskeraz eta ele bietan argitaratu da, beti be, parte hartu daben udalen tipologiaren arabera. Bata euskera hutsezko bertsinoa eta bestea ele bietakoa. Biek ala biek lau atal ditue: hiztegia, kartelak, idazkiak eta argibideak.

Lehenengo atala arlokako hiztegia da eta euskera-gaztelania / gaztelania-euskera bilaketak egiteko aukerea eskaintzen dau; bilaketak egiteko aukerea eskaintzeaz gan arlokako hiztegiak inprimidu daitekez. Bigarren atala kartelena da, batetik, kartel bereziak dagoz bertan, neurri berezikoak, eta bestetik, kartel orokorrak, gehien erabilten diranak eta merkatariek euren inprimagailuetan inprimiduteko modukoak. Kartel orokorrakaz batera kartel mutuak be erabilgarri dagoz eta euretan dendariek nahi daben testua aukeratu leikie. Hirugarren atalean, inprimaki ereduak txertatu dira, batetik orokorrak (fakturak, emote agiriak…) eta bestetik Gizarte Segurantza eta INEMekoak. Azkenik, laugarren atalean parte hartu daben euskera zerbitzuen informazinoa jaso da eta merkatarientzat interesgarriak izan daitekezan esteka batzuk.

Merkatariek euren eguneroko lana euskeraz egiteko behar dituen baliabideak batu ditue kanpaina hau bultzatu daben udalerrietako euskera zerbitzuek CD honetan, eta horri esker, merkatariek neurrira egindako materiala izango dabe. Horrezaz gan, unean uneko beharrizanen araberako materiala sortzeko aukerea be emoten deutse CDak.

Bilbon, gaur, hilak 11, egindako egitasmo honen jentaurreko aurkezpenean ondoko honeek izan dira: BFAko euskara sustatzeko zuzendari nagusia, Miren Dobaran, Sopelanako alkatea, Imanol Garai, Zaldibarko euskara zinegotzia, Nerea Garitagoitia (azken biek egitasmoan parte hartzen daben udal erakunde guztien ordezkari jardungo dabe), eta Aketza Sanchez, Plentziako Cabo Billano establezimenduaren jabea. Kanpaina hau Bizkaiko Foru Aldundiak, Eusko Jaurlaritzak eta Eudelek babestu dabe.

Kanpainan parte hartu duten udalak eta mankomunidadeak ondokoak dira: Abanto—Zierbena, Alonsotegi, Balmaseda, Berriz, Durango, Enkarterri, Getxo, Gordexola, Igorre, Lekeitio, Lemoa, Markina-Xemein, Muskiz, Ondarroa, Ortuella, Sestao, Uribe Kosta eta Zaldibar.

Ikusi argazki guztiak handiago