Joan Mari Torrealdai euskaltzain osoaren sarrera-ekitaldia Foruan

| Ikusi handiago | Argazki originala

Urriaren 31n, Joan Mari Torrealdai euskaltzain osoaren sarrera-ekitaldia egingo da Foruan (Bizkaia), Frantziskotarren eleizan, goizeko 11:00etan.

Hona hemen egitaraua:

• Igor Duñabeitia alkatearen ondo etorria.
• Andres Urrutia euskaltzainburuaren agurra.
• Joan Mari Torrealdairen sarrera-hitzaldia: 'Bibliografiatik bibliotekara. Esperantzari leihoa'.
• Jose Antonio Arana Martijaren erantzuna: 'Alexandriatik digitalizaziora'.
• Euskaltzain barriari dominea eta diploma emotea.

Joan Mari Torrealdai

Foruan jaio zan 1942an. Filosofia eta Teologia ikasketak bete zituan, Oliten (1960-1963) eta Arantzazun (1963-1967). Toulouseko 'Institut Catholique' ikastetxean atara eban Teologiako lizentziaturea, 1972an, eta Parisen, barriz, Hizkuntza Frantseseko diplomaturea ('Alliance Française', 1972) eta Gizarte Zientzietako lizentziaturea ('Institut d’Etudes Sociales', 1975). Informazino Zientzietan graduko lizentziatua, (EHU, 1984). Zientzia Politikoetan eta Soziologian doktorea da (Deustuko Unibersidadea, 1991).

'Anaitasuna' hamabostekaria zuzendu eban. Deustuko Unibersidadean Soziologiako irakasle izana (1976-1978 eta 1991-1993 urte tartean), Doktoratutzako klaseak be emon ditu Euskal Herriko Unibersidadean zein Deustukoan, 1978an. Bestalde, Euskal Idazleen Alkartea erakundeko idazkaria izana da (1969-1978), bai eta Soziologoen Euskal Alkartea erakundeko idazkaria (1979-1980) be.

Euskaldunon Egunkaria-ren Administrazino Kontseiluko kidea izan zan hasieratik bertatik, eta 2000tik 2003ra bitartean buru izan zan.

1977. urtetik, 'Jakin' aldizkariaren zuzendaria da.

1975eko bagilaren 27an, Euskaltzaindiak euskaltzain urgazle izentau eban. Akademiaren enkarguz, euskal idazleen eta euskerazko produkzino idatziaren azterketea egin eban.

Hogeita hamar urtetan zehar landu dauen lan bibliografikoak bi alor nagusi ditu: bat, liburua bera gizarte adierazle moduan ulertuta liburugintzearen azterketea, Jakin-en 30 zenbakitan emona eta modu zabalagoan 'Euskal idazleak gaur' eta 'Euskal Kultura gaur. Liburuaren mundua' liburuetan sakondua. Eta bi: liburuen katalogoa, fitxa bibliografikoz osotua.

Euskaltzaindiak Donostian 2007ko urriaren 26an eginiko osoko bilkuran, Joan Mari Torrealdai eta Lourdes Oñederra euskaltzain urgazleak proposatu zituen euskaltzain oso izateko, 29. eta 30. zenbaki-hutsarteak beteteko. Beraz, '29' zenbaki-hutsartea beteteko, Joan Mari Torrealdai euskaltzain urgazlea proposatu eben Jose Antonio Arana Martixa, Miren Azkarate eta Andres Urrutia euskaltzain osoek. Joan Mari Torrealdai euskaltzain osoaren sarrera-ekitaldia Foruan egingo da 2009ko urriaren 31n.

Argitaratu dituan lanen artean, besteak beste, ondokoak azpimarra daitekez: 'Iraultzaz'. Jakin, 1973; 'Euskal idazleak gaur / Historia social de la lengua y literatura vascas'. Jakin, 1976; 'El euskara y la cultura escrita'. Jakin, 1977; 'Euskal idazleak gaur'. Jakin, 1977; 'Euskal liburu eta aldizkariak'. Euskaltzaindia, 1978; 'Euskararen zapalkuntza'. Jakin, 1982; 'XX. Mendeko euskal liburuen katalogoa'. Gipuzkoako Foru Aldundia, 1993-97; 'El libro negro del euskara'. Ttarttalo, 1998; 'Martin Ugalde: Andoaindik Hondarribira Caracasetik barrena'. Jakin, 1998; 'La censura de Franco y los escritores vascos del 98'. Ttarttalo, 1998; 'XX. Mendeko euskal liburuen katalogoa, I, II, III, IV, V'. Gipuzkoako Foru Aldundia; 'Imanol Murua Gipuzkoako Alkate', Alkartasuna Fundazioa, 2004. Eta Imanol Muruagaz batera, egunotan argitaratutako 'Euskaltzaindia, ekin eta jarrai'. Euskaltzaindia, 2009.

Jaso dituan sarien artean: Euskadi de Plata Saria, (1997), 'Euskal Kultura Gaur' liburuari liburudendariek emona, Donostiako Liburu Eguneko Azokan liburu salduena izateagaitik. Euskadi de Plata Saria, (1998), 'El Libro Negro del Euskera' liburuari liburudendariek emona, Donostiako Liburu Eguneko Azokan liburu salduena izateagaitik. Eta, 2007an, 'XIX. Rikardo Arregi Kazetaritza Saria', Ohorezko aipamena.