EHUko ikertzaile batek euskerazko akats sintaktikoak topetako eta zuzentzeko sistemea sortu dau

| Ikusi handiago | Argazki originala

Akats sintaktikoak atzemon eta zuzentzeko dagozan tresnen analisia egin dau UPV/EHUko ikertzaile batek bere doktore-tesian. Testuinguru zabaleko akatsak detektetako -adibidez, komunztadura-erroreak- esaldiaren analisi-zuhaitza arakatzea beharrezkoa da. Horretarako, tresna aproposik ez dau topau ikertzaileak, eta, horregaitik, 'Saroi' tresnea sortu dau. Saroik akats sintaktikoen tratamendua egiten dau, eta, gainera, analisi-zuhaitzen egituren gaineko kontsultak egiteko eta zuhaitz horreetan egitura linguistikoak bilatzeko be balio dau.

Saroi tresna erabilerraza eta malgua da, eta maila desbardinetako hizkuntza-ezaugarriakaz lan egiteko gai da (morfologia, morfosintaxia, sintaxia, etab.). Egilearen esanetan, hizkuntzalaritzarako lan-tresna egokia eta erabilgarria izan daiteke.

Tesiaren egilea eta Saroiren sortzailea Maite Oronoz Anchordoqui da, eta bere lana 'Euskarazko errore sintaktikoak detektatzeko eta zuzentzeko baliabideen garapena: datak, postposizio-lokuzioak eta komunztadura' izenburupean aurkeztu dau. Ikertzailearen eretxiz, euskerearen egoerea dala eta (estandarizazino-prozesuan dago, aberatsa da euskalkiei jagokenez, eta erdara indartsuek inguratzen dabe) ohikoa da erabiltzaileek Euskaltzaindiaren arauetatik aldentzen diran hizkuntza-egiturak erabiltea. Egitura zuzenetatik edo arauetatik desbideratzen diran egitura horreei akats edo errore deitu deutse tesiaren egileak.

Datetan, postposizino-lokuzinoetan eta, batez be, subjektu, objektu eta zehar-objektu funtzinoa beteten daben osogaien eta aditzaren arteko komunztaduran izaten diran akatsak atzemon ditu ikertzaileak ikerketa-lanean.

Akats horreen bila corpus akastunak zein zuzenak modu automatikoan analizetako, UPV/EHUko Informatika Fakultateko IXA taldearen analisi sintaktikorako prozesua erabili dau Maite Oronozek, eta informazino linguistikoa adierazteko, barriz, XML bidezko oharpen-sarea.

Akatsak atzemon eta zuzentzeko erabilten diran teknikei gainbegiratu zabala emon ondoren, hizkuntza-ezagutzan oinarritutako teknikak erabiltea erabagi dau Oronozek. Holan, testuinguru lokaletan (segidan dagozan bospasei berbako eremuetan) jazoten diran akatsak atzemoteko eta zuzentzeko, hizkuntzearen tratamendu automatikoko bi tresna ezagun erabili ditu: Xerox Finite State Tool (XFST), datetako akatsak lantzeko, eta Murriztapen Gramatika (MG), postposizino-lokuzinoen erabilera okerrei aurre egiteko.

Egileari buruz

Maite Oronoz Anchordoqui (Hondarribia, 1972) Informatikan lizentziatua da. IXA taldeko ikertzailea da 1996tik, eta UPV/EHUko Informatika Fakultadeko irakasle laguna da 2001etik hona. Bere lana UPV/EHUko Informatika Fakultadeko Lengoaia eta Sistema Informatikoak saileko Arantza Díaz de Illarraza eta Koldo Gojenola irakasleen zuzendaritzapean egin dau.