Topaguneak eta AEK-k Mintzapraktika egitasmoa sendotzeko hitzarmena sinatu dabe

| Ikusi handiago | Argazki originala

Mintzapraktika egitasmoak zabaldu, sendotu eta garatzeko lankidetza hitzarmena sinatu dabe Topagunea Euskera Alkarteen Federazinoak eta AEK Helduen Alfabetatze Euskalduntzeko Koordinakundeak. Azken urteetan erakunde biek izandako loturea eta alkarlana hitzarmenean gauzatu dabe. Jasone Mendizabal zuzendariak, Topagunearen izenean, eta Mertxe Mugika koordinatzaileak, AEKren izenean, sinatu dabe hitzarmena Euskaltzaindiak Bilboko Plaza Barrian dauen egoitzan.

Mintzapraktika egitasmoek azken urteotan izan daben hazkundea azpimarratu dabe ordezkari biek eta alkarlanak hazkunde horretan izandako eragina handia izan dala gogoratu. Izan be, egun 2.600 lagunetik gora dagoz ia 50 herri eta eskualdetan egitasmoetan parte hartzen. Euskerearen erabileran eragiteko eta hiztunen hizkuntzeagazko atxikimentua lantzeko funtsezko egitasmoak bihurtu dirala esan dabe Mendizabalek eta Mugikak.

Hitzarmenaren bidez erakunde biek hartzen dabe herriz herri martxan jartzen diran egitasmoetan lekuan lekuko euskera alkarte eta euskaltegien arteko loturea bideratu eta alkarlana bultzatzeko konpromisoa. Era berean, egitasmoetan lanean dabizan dinamizatzaileentzako prestakuntza-saioak antolatu eta egitasmoak gizarteratzeko erakunde bien arteko lankidetzea sendotzea da hitzarmenaren helburu.

Topagunea eta AEKren arteko mintzapraktika egitasmoen ganeko alkarlana aspaldikoa da. Bizkaian martxan jarritako Berbabarri hitzarmenean hasi zan 2000. urtean, Bizkaiko Foru Aldundiagaz batera sinatutako hitzarmenaren bitartez.

Gerora, jardunaldiak antolatzeaz gan, azken hiru urteotan lotura sakona izan dabe erakundeok egitasmo barriak martxan jarri eta lehenagokoak hobetzeko helburuagaz. Era berean, www.mintzapraktika.org atariaren kudeaketea be erakunde bien artean daroe, Eusko Jaurlaritzearen laguntzinoagaz.