Topaguneak federazinoaren izaera parte-hartzailea sendotu gura dau datozan urteotan

Topagunea Euskera Alkarteen Federazinoaren Zuzendaritza Batzordeak azken urtean egindako hausnarketearen emoitza aurkeztu dau gaur, Euskaltzaindiaren Bilboko egoitzan egindako prentsaurrekoan.

Hausnarketa horreekaz batera, Topagunearen erakunde irudi barritua eta euskera alkarteen bazkide txartel bateratua be aurkeztu ditue Jasone Mendizabal zuzendariak, Iker Martinez de Lagos idazkariak eta Elgoibarko Izarra euskera alkarteko ordezkari Imanol Larrañagak.

Hizkuntza komunidadea trinkotu eta zabaldu

Euskera alkarteen mobimentuak 25. urteurrena ospatu dau 2008 urtean, Arrasateko AED alkartearen sorrerea gogoratu dan urtean. Federazinoak hamaika urtean egindako ibilbidearen gaineko hausnarketa egin dau Zuzendaritza Batzordeak eta hurrengo urteetako erronka nagusiak zehaztu ditu. Azken bi urteetan Topaguneak antolatutako e2i eta esku era jardunaldiak be lagungarriak izan dira hausnarketa hori egiteko.

Euskerearen normalizazinorako plangintzetan azken urteotan erabilerearen garrantziari gero eta autorpen zabalagoa emoten jakola adierazo dau Jasone Mendizabalek. Euskera alkarteen mobimentuak, bere sorreratik bertatik landutako bidea dala ikusita, pozgarritzat jo dabe Topagunearen ordezkariek euskerearen erabilerea bultzatzeko helburuek erakunde mueta desbardinetan zentraltasuna hartu izana. Helburu horreek bete daitezan estrategia egokiak eta baliabide nahikoak bideratzea izango da hurrengo erronka. Bi ardatzetan egituratzen dabe bere jarduera euskera alkarteek (euskerearen erabilerea bultzatzea eta sentsibilizazinoaren bidez herritarren eta erakundeen euskereagazko atxikimenduan eragitea) eta bi ardatz horreetan jarraituko dau Topaguneak be aurrerantzean bere lana antolatzen. Euskerearen normalizazinoa helburu harturik, Federazinoaren Zuzendaritza Batzordeak garapenaren oinarria euskaldunon hizkuntza komunidadea trinkotu eta zabaltzean jarri dauela azaldu dau Mendizabalek.

Topaguneak hurrengo hiru urteetarako barne-hausnarketa prozesu parte-hartzailea antolatuko dauela azaldu dau Federazinoko zuzendariak, kongresu batean amaituko dan prozesuan. Bazkideakaz landu gura dan gogoetearen oinarria izango da hizkuntza komunidade antolatuaren gune modura lekuan lekuko euskera alkarteen funtzinoa barritzea eta aldarrikatzea. Helburu nagusi hori aintzat hartuta Hizkuntza Politikaren oinarriak, parte hartzea eta sentsibilizazinoa moduko gaiak izango dira aztergai prozesu honetan. Topaguneak prozesua ilusinoz abiatzen dauela azpimarratu dau Jasone Mendizabalek.

Irudi barritua

Garai barriari irudi barrituagaz hasiko dauela azaldu dau Iker Martinez de Lagos Topaguneko idazkariak. Federazinoaren 12 urteko ibilbidean erabilitako irudia barrituta, euskera alkarteen aniztasuna, hurbiltasuna eta bilgune izaerea jasoten dituan erakunde irudia landu dau.

Irudi barria Zuzendaritza Batzordetik abiatu eta bazkideekin landu gura dan gogoeta prozesu barrirako ikurra izatea gura dau Topaguneak.

Bazkide txartela

Hirugarren ekimen bat be aurkeztu dau Topaguneak Bilbon egindako prentsaurrekoan, Topakide txartela, euskera alkarteen bazkide txartela. Euskera Alkarteen mobimentua Araba, Bizkaia, Gipuzkoa eta Nafarroan ondo errotutako mobimentua dala ekarri dau gogora Imanol Larrañagak, Elgoibarko Izarra Euskera Alkarteko ordezkariak. 20.000 bazkidetik gora ditue egun Topagunea osotzen daben euskera alkarteek. Aspaldiko helburuari erantzunez, bazkide txartel bateratua preparau da azken hilabeteetan.

21 euskera alkartetako 11.000 bazkidek izango dabe apirilaren bukaeratik aurrera esku artean gaur aurkeztu dan bazkide txartela. Aurrerantzean gainontzeko euskera alkarteek be euren kideentzako txartela banatzeko aukerea izango dabe. Txartelak hiru helburu nagusi dituala azpimarratu dau Larrañagak: lekuan lekuko euskera alkarteen bazkideak mobimentu zabal bateko kide dirala ikustarazotea, euskera alkarteen arteko jardun koordinatua bultzatzea eta euskera alkarteen Mobimentuaren jarduerearen bolumena erakustea.

Txartelaren jaubeek, inguruko euskera alkarteen jardueretan abantailak lortu ahal izango ditue maiatzetik aurrera eta etorkizunean txartelari bestelako erabilgarritasunak be emongo jakozala azaldu dabe.

Ikusi argazki guztiak handiago