Euskaltzaindiak Bidegain, Telletxea Idigoras, Etxeberri, Knörr, Iratzeder eta Etxenagusia omenduko ditu

Datorren barikuan, zezeilak 27, Euskaltzaindiak agiriko bilkurea egingo dau Donostian, Gipuzkoako Foru Aldundian, arratsaldeko 16:30ean, azken urtean hil diran euskaltzainak omentzeko.

Ondoko hilberri-txostenak irakurriko dira:

Maria Pilar Lasartek Milagros Bidegain euskaltzain urgazleari buruzko txostena irakurriko dau; Joseba Intxaustik Jose Ignacio Telletxea Idigoras euskaltzain urgazleari buruzkoa; Pierre Charrittonek Jacques Etxeberri euskaltzain urgazleari buruzkoa; Jose Luis Lizundiak Henrike Knörr euskaltzain osoari buruzkoa; Jean Haristchelharek Xabier Diharce 'Iratzader' euskaltzain osoa hartuko dau berbagai eta, azken buruan, Adolfo Arejitak Karmelo Etxenagusia ohorezko euskaltzainari buruzko hilberri-txostena aurkeztuko dau.

2009ko urtarrilean hildako Antonio Zavala euskaltzain osoa hurrengo ekitaldi batean omenduko dau Akademiak.

31. domina-hutsartea

Bestalde, zezeilaren 27an egingo dan osoko batzarrean, euskaltzain barria izateko hautagaiak aurkezteko azken aukerea izango da.

2008ko abenduaren 19an, Pasaian egindako osoko batzarrean, 31. domina-hutsartea aldarrikatu zan, Txomin Peillen euskaltzain emeritu izatearen ondorioz. 2007ko zemendiaren 30ean, Bilbon egindako osoko batzarrean, Euskaltzaindiak euskaltzain emeritu izentau eban Txomin Peillen.